Ես երեկ հայտարարել եմ, ատելության խոսքի անընդունելիության մասին եւ նշել, որ նույնիսկ մեզ հայհոյողներին չպետք է հայհոյանքով պատասխանենք, որովհետեւ դա մեր էությունը չի: Այս մասին, այսօր՝ մարտի 12-ին, Վայքում քարոզարշավի ժամանակ իր ելույթում նշեց ՀՀ վարչապետ Նիկոլ Փաշինյանը:
«Պարզ է, բոլորս էլ նեղվում ենք, նյարդայնանում ենք, երբեմն ջղայնանում ենք, երբեմն կատաղում ենք, բայց դա կապ չունի: Մեզնից յուրաքանչյուրի վրա դրված է բարձր պատասխանատվություն եւ մենք պետք է դա պատվով տանենք:
Երեկ մի խումբ մարդիկ, ովքեր հանդես են գալիս որպես թավշյա հեղափոխության պահապաններ, գնացել են ինչ-որ մի մարդու մոտ, ով իմ հասցեին ինչ-որ վատ բան է ասել, թե հայհոյանք է ասել, պահանջել են ներողություն խնդրել: Դա շատ վատ տեսարան է: Դա ինձ համար անընդունելի է»,-ասաց Փաշինյանը:
Նա հիշեցրեց, որ երկու օր է ինքը խոսում է, որ վիրավորանքին վիրավորանքով չպետք է պատասխանել. «Բայց մարդիկ գնում են ու նման գործողություններ են անում ի պաշտպանություն մեզ, ի պաշտպանություն ինձ: Ես դատապարտում եմ նման գործողությունները, դա անընդունելի եմ համարում»:
Փաշինյանը, դիմելով իրենց կողմնակիցներին, կոչ արեց սադրանքների չտրվել. «Հայհոյում են, ջհանդամը հայհոյեն, իրենց գլխին թող կպնի իրենց հայհոյանքը: Կարեւորն այն է՝ կա արդյո՞ք այդ հայհոյանքի հիմքում ճշմարտություն, թե չկա: Եթե ճշմարտություն կա, ուրեմն ճիշտ են անում, որ հայհոյում են, եթե չկա, անիմաստ է, ինչքան ուզում են, թող հայհոյեն: Կարեւորը՝ ժողովուրդը գիտի ճշմարտությունը: Այսօր Հայաստանում կա վստահության մթնոլորտ: Ոմանց երազանքներն այս երկու օրը փշուր-փշուր եղան, քանդվեցին, որովհետեւ նրանք հույս ունեին, որ ժողովուրդը հիասթափվել է, բայց դա այդպես չէ»:
Փաշինյանը նշեց, որ ժողովուրդը չի կարող հիասթափված լինել, քանի որ եկել է իշխանության, իսկ իրենք ուղղակի վարձու աշխատողներ են: Իսկ եթե մարդիկ հիասթափվեն, կարող են նոր կառավարություն ընտրել. «Սակայն ես բացառում եմ, որ ժողովուրդը կհամաձայնվի իրեն թալանածների վերադարձին»: