Ուրբաթ ԱՄՆ զինված ուժերի Կենտրոնական հրամանատարության ղեկավար, գեներալ Քենեթ Մակենզին նախազգուշացրել է Իրանի իշխանություններին պատասխան քայլերի չդիմել Իրաքում շիական «Քաթաիբ Հիզբոլլահ» խմբավորման օբյեկտների ուղղությամբ կոալիցիայի կողմից հարվածի հետ կապված, փոխանցում է ՏԱՍՍ-ը:
«Ես կնախազգուշացնեի Իրանին եւ այն ուժերին, որոնց նրանք աջակցում են, չդիմել պատասխան քայլերի, որոնք կարող են վտանգել Միացյալ Նահանգների, կոալիցիայի կամ մեր գործընկերների ուժերը»,- ասել է նա Պենտագոնում կայացած ճեպազրույցի ժամանակ: Գեներալը շեշտել է, որ ԱՄՆ իշխանությունները պատրաստ են պաշտպանել իրենց ուժերը տարածաշրջանում «եւ պատասխանել ցանկացած հետագա ագրեսիային»:
Ըստ նրա` ԱՄՆ իշխանությունները որոշում են կայացրել այս փուլում Պարսից ծոցում երկու ավիակիր գրոհիչ խումբ թողնել` Իրանի հետ հարաբերությունների սրման նկատառումներով:
«Ես խնդրեցի, իսկ Պաշտպանության նախարարը (ԱՄՆ Մարկ Էսպեր) հավանություն տվեց իմ հայցին` երկու ավիակիր գրոհիչ խմբերի` նշված շրջանում գործունեության շարունակման վերաբերյալ»,- տեղեկացրել է Մակենզին: Նա հրաժարվել է մանրամասնել, թե որքան երկար նրանք կմնան տարածաշրջանում, բայց պարզաբանել է, որ խոսքը Dwight D. Eisenhower եւ Harry S. Truman ավիակիրների մասին է: