Ադրբեջանում բանտարկությունից ազատված լրագրող Աֆղան Մուխտարլին մեկնել է Բեռլին, որտեղ նրան դիմավորել են ընտանիքի անդամները եւ մի խումբ ադրբեջանցի ակտիվիստներ:
Նա Turan-ի թղթակցին հայտնել է իր ազատվելու որոշ մանրամասներ:
Մուխտարլիի խոսքով՝ իր ազատման շուրջ քննարկումներն ընթանում էին դեռեւս անցյալ տարվա աշնանից: Այս հարցն ակտիվորեն բարձրացրել էին միջազգային կազմակերպությունները, Գերմանիայի կառավարությունը, ԱԳՆ-ն: Բանտում իրեն տեսակցել են Եվրոպայի խորհրդի մարդու իրավունքների հանձնակատար Դունյա Միյատովիչը, ԵԽԽՎ զեկուցող Սուննա Էվարսդոտիրը:
Այս կապացությամբ իր ազատվելը սպասվում էր դեռեւս 2019 թվականի դեկտեմբերին:
Այդ ժամանակ դա տեղի չունեցավ, բայց իր հանդեպ վերաբերմունքը փոխվեց, սահմանափակումներ հանվեցին:
«Բայց այն, որ ինձ հենց հիմա էին ազատելու, ես տեղյակ չէի»,- նշել է Մուխտարլին:
Նրա խոսքով՝ մարտի 17-ի առավոտյան Սուրախանի շրջանային դատարանը քննել է պատիժը մեղմացնելու վերաբերյալ իր դիմումը:
Դատարանը 600 դոլարի տուգանք է նշանակել եւ իրեն ազատել:
Դատարանից ուղղիչ ծառայության ավտոմեքենայով նրան տարել են օդանավակայան, որտեղ հանդիպել է նաեւ Գերմանիայի դեսպանության աշխատակիցների հետ:
Մուխտարլին նշել է, որ Բեռլին է ժամանել Մոսկվայով տարանցումով:
Այս հարցի հապշտապ լուծումը, հավանաբար, պայմանավորված է այն հանգամանքով, որ մարտի 17-ը Բաքվի եւ Մոսկվայի միջեւ ավիահաղորդակցության վերջին օրն էր:
Ավելի վաղ կորոնավիրուսի համավարակի հետ կապված դադարեցվել էին Բաքվից դեպի Բեռլին եւ այլ քաղաքներ ավիաչվերթները:
Հարցին, թե լրագրողական գործունեության հետ կապված որեւէ պայման առաջադրվել է, նա բացասական է պատասխանել:
«Ոչ, նման բան չկա: Ինձ միայն ասել են, որ ես քննադատելիս չպետք է վիրավորեմ եւ հայհոյեմ: Սակայն ես ընդհանրապես որեւէ մեկի նկատմամբ նման բան չեմ կիրառում»,- նշել է Մուխտարլին:
Նա ասել է, որ այժմ իր ինքնազգացողությունը նորմալ է: Մուխտարլին հայտնել է, որ կշարունակի լրագրողական հետաքննությունը, ինչպես նաեւ կաջակցի Ադրբեջանում ժողովրդավարական փոփոխությունների ջանքերին:
Հետաքննող լրագրող Աֆղան Մուխտարլին, որը համագործակցել է Meydan TV-ի հետ, առեւանգվել էր 2017 թվականի մայիսին Թբիլիսիում եւ գաղտնի տեղափոխվել Ադրբեջան: Նրան մեղադրում էին մաքսանենգության, սահմանն ապօրինի հատելու, սահմանապահների նկատմամբ բռնություն կիրառելու մեջ: Մուխտարլին դատապարտվել էր 6 տարվա ազատազրկման:
Մուխտարլիի ձերբակալությունը քննադատել են Եվրախորհրդարանը, միջազգային իրավապաշտպան կազմակերպությունները: Amnesty International-ը նրան «խղճի գերի» է ճանաչել: