Համաշխարհային ճանաչում ունեցող երաժիշտ եւ կոմպոզիտոր Սերժ Թանկյանը հանդես է եկել Նոր Զելանդիայում Հայոց ցեղասպանությունը ժխտելու դեմ: Նա հանդես է եկել Նոր Զելանդիայի Հայ ազգային կոմիտեի (ANC-NZ) կողմից կազմակերպված միջոցառմանը, հաղորդում է Asbarez-ը:
Ավելի վաղ երկրի ԱԳՆ ղեկավար Ուինսթոն Փիթերսը, որը նաեւ երկրի փոխվարչապետն է, հայտարարել է, որ նամակով դիմել է պատգամավորներին, որում կրկնել է Հայոց ցեղասպանության նկատմամբ երկրի դիրքորոշումը, այն է՝ «ցեղասպանություն» բառը փոխարինել «ողբերգություն» բառով:
Նամակում Փիթերսը պատգամավորներին խնդրել է հաշվի առնել կառավարության դիրքորոշումը:
Միջոցառմանը Թանկյանը պատմել է, որ ինքը Ցեղասպանությունը վերապրածների թոռ է, եւ դա մեծ ազդեցություն է ունեցել իր կյանքի ու կարիերայի վրա:
Ավելի վաղ Թանկյանը Newshub-ին տված հարցազրույցում նշել է, որ երկրները խուսափում են ցեղասպանություն բառից, քանի որ Թուրքիան չի ցանկանում, որպեսզի կառավարություններն օգտագործեն այդ բառը:
Նշենք, որ միջոցառմանը ներկա են եղել ANC-NZ-ի անդամները, ինչպես նաեւ Ավստրալիայի Հայ ազգային կոմիտեի (ANC-AU) անդամներն ու առաջատար գիտնականները, որոնք պատմել են հայերի, ասորիների եւ հույների ցեղասպանությունների, ինչպես նաեւ մարդկության դեմ այդ հանցագործությունների հարցում արդարության հասնելու կարեւորության մասին: