Արտասահմանում Հայաստանի բոլոր հյուպատոսություններում թեժ գծեր են աշխատում, որոնք հասանելի են նաեւ բջջային հավելվածներով: Այս մասին մարտի 18-ին ճեպազրույցում ասաց ԱԳՆ հյուպատոսական վարչության պետ Արտակ Ավետիսյանը:
Նա հայտնեց, որ ԱԳՆ թեժ գծին ստացվող հարցերը փոխանցվում են տեղերի դեսպանություններին եւ հյուպատոսություններին, որտեղ քաղաքացիների հարցերը հնարավորության սահմաններում լուծվում են: Եթե պարզվի, որ հատուկ չվերթի անհրաժեշտություն կա, այդ մասին կհայտնվի:
Ի պատասխան Վերին Լարսում խցանված Հայաստանի քաղաքացիների վիճակի մասին հարցին՝ Ավետիսյանը նշեց, որ խոսքը մոտ 40 քաղաքացու մասին է: Նրանց հետ կապի մեջ է Դոնի Ռոստովի հյուպատոսությունը: Քաղաքացիներին առաջարկվում է օգտվել ռուսական օդանավակայաններով՝ Ռոստովի, Մինվոդիի, Պյատիգորսկի, Մոսկվայի, հայրենիք վերադառնալու հնարավորությունից: Հիշեցնենք, որ Վրաստանով երթեւեկությունը փակ է՝ կապված այս երկրի իշխանությունների մտցրած սահմանափակումների հետ:
Այն հարցին, թե ինչպե՞ս է լուծվելու ավելի վաղ տրված վիզաների հարցը, որոնցից քաղաքացիները չեն հասցրել օգտվել, վարչության պետը հիշեցրեց, որ արտասահմանյան պետությունների կողմից տրված վիզաների հարցը Հայաստանի ԱԳՆ իրավասության մեջ չի մտնում: «Սակայն մենք կուսումնասիրենք դիմումները եւ կփորձենք հարցը բարձրացնել գործընկերների հետ հանդիպումների ժամանակ»,- խոստացավ Ավետիսյանը: