Հայաստանի նախագահ Սերժ Սարգսյանն այսօր` ապրիլի 23-ին ընդունել է Շվեդիայի խորհրդարանի (Ռիկստագի) Շվեդիա-Հայաստան բարեկամության պատգամավորական խմբի նախագահ Անելի Էնոքսոնին եւ խմբի անդամ Կառլ Ֆրեդրիկ Մալմին, ովքեր ակտիվ դերակատարություն են ունեցել Ռիկստագում Հայոց ցեղասպանության ճանաչման բանաձեւի ընդունման գործում:
Նախագահի մամուլի գրասենյակից NEWS.am-ին հայտնում են, որ նախագահը կարեւորել է շվեդ պատգամավորների այցը մեր երկիր եւ հույս հայտնել, որ նաեւ Շվեդիա-Հայաստան բարեկամության պատգամավորական խմբի ջանքերով երկու երկրների միջխորհրդարանական հարաբերությունները կզարգանան:
«Ցանկանում եմ ձեզ եւ ձեր բոլոր համախոհներին շնորհակալություն հայտնել մեր ժողովրդի անունից` Շվեդիայի Ռիկստագում Հայոց ցեղասպանության ճանաչման բանաձեւն ընդունելու համար: Ավելորդ չէ ասել, որ մեզ համար չափազանց կարեւոր է Հայոց ցեղասպանության միջազգային ճանաչումը:
Բայց Ռիկստագի որոշումը երկու կարեւոր առանձնահատկություն ունի. մեկն այն է, որ այդ որոշումը եւս մեկ անգամ վկայում է, որ Շվեդիան` սերտ փոխգործակցություն ունենալով Թուրքիայի հետ, միանգամայն հնարավոր է համարել նման որոշում ընդունելը: Դա շատ լավ օրինակ կարող է լինել այլ երկրների համար»,- նշել է Սարգսյանը եւ հավելել. «Եւ երկրորդ՝ այդ բանաձեւը դուք ընդունեցիք մի ժամանակահատվածում, երբ մենք փորձում էինք Թուրքիայի հետ հարաբերություններ սկսել: Մեր բոլոր ընդդիմախոսներն ասում էին, թե այդ քայլով մենք ձախողեցինք Հայոց ցեղասպանության ճանաչման գործընթացը, եւ այլեւս ոչ ոք չի ճանաչի Հայոց ցեղասպանությունը: Բոլորի համար հասկանալի դարձավ, որ կարելի է փորձել Թուրքիայի հետ հարաբերություններ հաստատել` միեւնույն ժամանակ շարունակելով ցեղասպանության ճանաչման գործընթացը»:
Հանրապետության ղեկավարը նշել է, թե Հայաստանում ուրախ կլինեն ավելի հաճախակի հյուրընկալել Շվեդիա-Հայաստան բարեկամության պատգամավորական խմբի անդամներին եւ նրանց գործընկերներին, ինչը լավ հնարավորություն է ավելի մոտիկից ճանաչելու Հայաստանն ու հայ ժողովրդին, նաեւ` տեղում ծանոթանալու տարածաշրջանի խնդիրներին, որոնց լուծման գործում բարեկամների աջակցությունը եւս կարեւոր է:
Շվեդ պատգամավորներն ընդգծել են, թե ցեղասպանությունը ցանկացած պարագայում մնում է ցեղասպանություն եւ այլ անունով այն չի կարելի անվանել: