Հավաքական անվտանգության պայմանագրի կազմակերպությունում (ՀԱՊԿ) «չափազանց մտահոգված» են COVID-19 համավարակով, ծրագրվել եւ իրականացվում են հակավիրուսային համալիր միջոցառումներ, «ՌԻԱ Նովոստի»-ին հայտնել է կազմակերպության մամուլի քարտուղար Վլադիմիր Զայնետդինովը:
«ՀԱՊԿ անդամ պետություններում չափազանց մտահոգված են COVID-19 վիրուսային ինֆեկցիայի տարածմամբ… Ծրագրվել եւ իրականացվում են հակավիրուսային համալիր միջոցառումներ»,- ասել է Զայնետդինովը:
Նրա խոսքով՝ այս ուղղությամբ որպես գործնական քայլեր ժամանակավորապես չեղյալ են հայտարարվել աշխատակիցների ծառայողական գործուղումները համաճարակաբանական անբարենպաստ իրադրությամբ պետություններ: «Որոշվել է Քարտուղարության եւ ՀԱՊԿ Միացյալ շտաբի շենքերում սահմանափակել կազմակերպության անդամ պետությունների ներկայացուցիչների մեծ մասնակցությամբ միջոցառումների անցկացումը եւ Քարտուղարության ու ՀԱՊԿ Միացյալ շտաբի աշխատակիցների Մոսկվայի սահմաններից դուրս գալը»,- հստակեցրել է նա:
Դրանից բացի, Զայնետդինովը հայտնել է, որ «նախազգուշական միջոցների ձեռնարկման շրջանակում Քարտուղարությունում եւ ՀԱՊԿ Միացյալ շտաբում ՀԱՊԿ Ճգնաժամային արձագանքման կենտրոնի հնարավորությունների օգտագործմամբ, կազմակերպության անդամ պետությունների նախարարությունների ու գերատեսչությունների հետ սերտ փոխգործակցությամբ իրականացվում է հավաքական անվտանգության տարածաշրջանում համաճարակաբանական իրադրության ամենօրյա մոնիթորինգ»:
ՀԱՊԿ-ի մեջ են մտնում Ռուսաստանը, Հայաստանը, Տաջիկստանը, Ղազախստանը, Ղրղզստանը եւ Բելառուսը: