Էջմիածնի դեպքը ամենավառ օրինակն է հանցավոր անզգուշության: Այս մասին այսօր` մարտի 20-ին, ԱԺ արտահերթ նիստին ասաց ԱԺ փոխնախագահ Ալեն Սիմոնյանը` անդրադառնալով ԲՀԿ խմբակցության պատգամավոր Գեւորգ Պետրոսյանի այն դիտարկմանը, թե ինչ է նշանակում հանցավոր անզգուշություն:
«Պետք է հաշվի առնենք, որ օրենքն ունենում է նաեւ կանխարգելիչ ֆունկցիա: Պարոն Պետրոսյան, ասում եք հանցավոր անզգուշության մասին, Էջմիածնի դեպքը ամենավառ օրինակն է հանցավոր անզգուշության: Կինը ենթադրել է, որ ինքն իրեն բուժել է եւ ինքը որեւիցե մեկի համար այլեւս վտանգավոր չի, ինքն իր ենթադրություններից ելնելով գնացել է նշանդրեք եւ չեմ կարծում,ո ր դիտավորությամբ համբուրվել եւ գրկախառնվել է բոլոր հյուրերի հետ: Ես չեմ կարծում, որ կինը ենթադրել է, որ իր տղայի միջոցառման ժամանակ ինքը մեկին կվարակի»,-ասաց Սիմոնյանը:
Ալեն Սիմոնյանը հավելեց, որ թե «Լուսավոր Հայաստան» եւ թե ԲՀԿ խմբակցությունների առաջարկներն ընդունելի են ու ասածների մեջ շատ բաներ կան, որոնք իրոք պետք է փոփոխվեն:
«Մենք էս ժամանակը կօգտագործենք, միասին կաշխատենք եւ շտկումները կանենք»,- ասաց նա` հավելելով, որ 5 տարվա ազատազրկման մասին կետը նույնպես պատրաստ են վերանայել:
Նշենք, որ ՀՀ Ազգային ժողովի արտահերթ նիստին առաջին ընթերցմամբ ընդունեց արտակարգ դրության պայմաններում սահմանված նորմերը խախտելու համար պատիժներ սահմանող օրենքների փաթեթը։
