Հնդկաստանի գյուղական շրջաններում ջրամատակարարումն ապահովում են ջրհորները, բայց մարդկանց հարեւանությամբ ապրող վայրի կենդանիները մշտապես ընկնում են դրանց մեջ, հայտնում է Nat-geo-ն:
Վաղուց է մշակված փրկության մեխանիզմը. ջրհոր են իջեցնում յուրատեսակ պատգարակներ եւ հետո դրանց վրա կենդանուն մակերեւույթ են բարձրացնում: Սովորաբար ամեն ինչ լավ է ավարտվում, բայց վերջերս Մադհյա-Փրադեշ նահանգում փրկված ընձառյուծը հարձակվել էր նրանց վրա, ովքեր իրեն օգնել էին:
Գիշատիչը ծուղակում էր հայտնվել մարտի 17-ին: Տեղացիները ջրհոր են իջեցրել շրջանակ, որի վրա ցանց էր ձգված, այնուհետեւ այն վերեւ են քաշել, բայց ահռելի սթրես ապրած գազանն անմիջապես հարձակվել է մարդկանց վրա: Փրկարարական գործողության մասնակիցներից մեկին վայր գցելով՝ նա հետապնդել է մյուսին, ճանկերով նրան վնասել է եւ փախել: