Հաստատվում են նվազագույն ստանդարտներ, որոնց շնորհիվ հնարավոր է դառնում պատասխանատվության ենթարկել այն անձանց, որոնք չեն գիտակցում կորոնավիրուսի ամբողջ վտանգավորությունը եւ բնակչության վրա ազդեցությունը: Այս մասին մարտի 23-ին ԱԺ արտահերթ նիստում Վարչական իրավախախտումների օրենսգրքում եւ Քրեական օրենսգրքում լրացումներ կատարելու մասին օրենսդրական փաթեթի քննարկմանն ժամանակ ասաց Պետաիրավական հարցերի խորհրդարանական մշտական հանձնաժողովի նախագահ, իշխող «Իմ քայլը» դաշինքի պատգամավոր Վլադիմիր Վարդանյանը:
Պատգամավորը նաեւ շնորհակալություն հայտնեց իր գործընկերներին, Երեւանի պետական համալսարանի մի քանի դասախոսների, օմբուդսմենի գրասենյակի աշխատակիցներին՝ վերջին մի քանի օրերին նրանց լարված աշխատանքի համար:
Հիշեցնենք, որ մարտի 23-ին Ազգային ժողովը երկրորդ եւ վերջնական ընթերցմամբ միաձայն ընդունեց Վարչական իրավախախտումների օրենսգրքում եւ Քրեական օրենսգրքում լրացումներմ կատարելու մասին օրինագծերի փաթեթը, որոնց համաձայն առաջարկվում է խախտումների համար տուգանել եւ քրեական պատասխանատվության ենթարկել այն քաղաքացիներին, որոնք դրանք թույլ են տվել Կառավարության հայտարարած արտակարգ դրության ռեժիմի պայմաններում: