Օսմանյան կայսրությունում հայոց ցեղասպանության 96-րդ տարելիցին նվիրված ջահերով երթ է կազմակերպվել Սոչիի Լազարեւյան շրջանում: Ինչպես հայտնում է Ռուսաստանի հայերի «Երկրամաս» թերթի տեղեկատվական կենտրոնը, երթին մասնակցել են մոտ երեք հարյուր մարդ` ջահերով, Հայաստանի եւ Ռուսաստանի դրոշներով: Նրանք պաստառներ են տարել` «Ցեղասպանությունը հանցագործություն է մարդկության դեմ», «Միայն ապաշխարությունը կփրկի Թուրքիային», «Չեն մոռանա, չենք ների»: Նշենք, որ ջահերով երթը Սոչիում ընթանում է արդեն երկրորդ տարին:
Երթն ավարտվել է Վոլնոկա գյուղում, Ցեղասպանության զոհերի հիշատակին նվիրված Խաչքարի մոտ:
Նշենք, որ այսօր` ապրիլի 24-ին ողջ աշխարհի հայությունը նշում է 1915-23 թթ Օսմանյան Թուրքիայում տեղի ունեցած հայոց ցեղասպանության 96-րդ տարելիցը: 1915 թվականի այս օրը Օսմանյան Թուրքիայի ղեկավարության հրամանով սպանվեց Ստամբուլի մտավորականությունը, այնուհետեւ տեղի ունեցան զանգվածային կոտորածներ: Երկրի ողջ հայ բնակչությունը տեղահանվեց իր բնօրրանից ու քշվեց դեպի Դեր Զորի անապատները, ճանապարհին ոչնչանալով: Ցեղասպանությանը զոհ գնաց 1,5 մլն հայ:
Հիշեցնենք նաեւ, որ Հայոց ցեղասպանության փաստը ճանաչվել է բազմաթիվ երկրների կողմից: Առաջինը 1965 թվականին դա արել է Ուրուգվայը, որի օրինակին հետեւել են Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, ԱՐգենտինան, ԱՄՆ 42 նահանգներ: Հայոց ցեղասպանությունը ճանաչել է նաեւ Վատիկանը, Եվրախորհրդարանը եւ Եկեղեցիների համաշխարհային խորհուրդը: