Պարսից ծոցի միապետությունները ժամանակին կարողացել էին «թամբել» նավթային հարստությունները, սակայն մոտ ապագայում Սաուդյան Արաբիային եւ նրա հարեւաններին կարող են սպասել լուրջ ֆինանսական խնդիրներ: Այսպիսի կարծիք է հայտնել Bloomberg գործակալության սյունակագիր Դեւիդ Ֆիկլինգը:
«Նավթային շուկաներում ներկայիս գնային պատերազմը միայն կարագացնի այն պահի մոտենալը, երբ Պարսից ծոցի երկրների տնտեսությունների անկայուն բնույթին խիստ հաշիվ կներկայացվի»,- նշում է Ֆիկլինգը:
Հեղինակը որպես օրինակ ներկայացրել է Սաուդյան Արաբիայի կառավարության ֆինանսական ակտիվների հետ կապված իրավիճակը. ԿԲ ոսկու եւ արժութային պահուստները՝ գումարած սուվերեն ֆոնդերի ակտիվները, հանած կառավարության պարտքերը: «Դրանք կրճատվել են եւ կազմում են համախառն ազգային արտադրանքի ընդամենը 0,1 տոկոսը, մինչեւ 2018 թվականը 4 տարի շարունակ կազմում էին 50 տոկոսը»,- հիշեցրել է սյունակագիրը:
ԱՄՀ տվյալների համաձայն՝ նույն 4 տարիների ընթացքում Պարսից ծոցի 6 միապետությունների ֆինանսական ակտիվների զուտ մեծությունը կրճատվել է շուրջ կես տրիլիոն դոլարով՝ կազմելով 2 տրիլիոն, նշել է Ֆիկլինգը: «Եթե նավթի պահանջարկի բարձրակետը չլինի 2040 թվականից վաղ, ԱՄՀ փորձագետների կարծիքով, մնացյալ գումարը կսպառվի 2034 թվականին: Իսկ եթե նավթն արժենա բարելի դիմաց 20 դոլար, ապա այդ ակտիվներն ավելի արագ կսպառվեն, իսկ այդ երկրների գանձատները կդատարկվեն արդեն 2027 թվականին»,- նշել է նա:
Սյունակագիրը հավելել է, որ ԱՄՀ կարծիքով՝ եթե նավթի գինը լինի 50-ից մինչեւ 55 դոլարի միջակայքում, ապա Սաուդյան Արաբիայի ոսկու եւ արժույթի պահուստներն արդեն 2024 թվականին կկրճատվեն մոտ մինչեւ ներմուծման հնգամսյա ծախսերի գումար: Նրա խոսքով՝ նման տարբերակը չափազանց տագնապահարույց է, քանի որ ընդամենը մի քանի ամիս հետո թագավորությունը կարող է հայտնվել «անհավանական ճգնաժամում» եւ ստիպված կլինի հրաժարվել դոլարի ֆիքսված փոխարժեքից, որը մի ամբողջ սերնդի կյանքի ընթացքում պահպանում էր նավթի գլոբալ առեւտուրը:
