Եթե մեր իշխանությունները ժամանակին կիրառեին արտակարգ իրավիճակը, մենք այսօր երեւի այսպիսի խայտառակ պատկեր չէինք ունենա։ Այս մասին այսօր՝ մարտի 24–ին, լրագրողների հետ հանդիպմանն ասաց «Համերաշխություն շարժում» կուսակցության նախագահ Սարգիս Ավետիսյանը:
«Որքան էլ մենք ուզենք այլ բաներից խոսենք, 24 ժամն այսօր հագեցված է կորոնավիրուսով, ամեն ինչ կապված է այդ պանդեմիայի հետ։ Աշխարհը խառնվել է իրար, տարբեր երկրներում տարբեր գործողություններ են անում: Եթե մեր իշխանությունները ժամանակին կիրառեին արտակարգ իրավիճակը, մենք այսօր երեւի այսպիսի խայտառակ պատկեր չէինք ունենա»,- ասաց Ավետիսյանը:
Նրա խոսքով` իշխանությունների գերխնդիրը Արցախում ընտրությունները եւ իրենց թեկնածուի հարցն է. «Փորձում են ամեն կերպ անցկացնել իրենց թեկնածուին։ Բայց ես համոզված եմ, որ Արցախի մեր հայրենակիցները ճիշտ հետեւություններ կանեն։ Իրենց տրված է պատմական հնարավորություն` ընտրել մի ղեկավարի, որը Վիտալի Բալասանյանն է: Մարդ, որն անցել է պատերազմով, կազմակերպված է, ամենածանր պահին գիտի` իրեն ինչպես պահել, ապա կարող է այս ծանր եւ խայտառակ վիճակից Արցախին հանել փառք ու պատվով: Ես կարծում եմ, որ այդպես էլ կլինի, քանի որ դեռեւս այս վարակը չի հասել Արցախ կամ եթե հասել է, ապա այնպես չի տարածվել, որ մարդիկ զոմբիանան եւ չկարողանան ճիշտ որոշում կայացնել։ Նրանք, ովքեր Արցախում խոսում են ժողովրդավարությունից, նրանք ուղղակի կողմնակից են նրան, որ երկրում հաստատվի դիկտատուրա»:
Ավետիսյանի կարծիքով` Արցախին այսօր ոչ թե ժողովրդավարություն է պետք,այլ կազմակերպված իշխանություն:
«Տեսեք, թե ինչ է կատարվում աշխարհում։ Նույնիսկ ԱՄՆ-ում բանտերից մարդկանց բաց են թողնում, իսկ մեզ մոտ Հանրապետության երկրորդ նախագահին անօրինական պահում են բանտում։ Եթե մենք սրանից հետեւություններ չանենք, ապա Աստված կպատժի այս իշխանություններին»,- ասաց Ավետիսյանը:
