Երբ խորհրդարանի կամ պատգամավորների լիազորությունները մեծացնելու հարց ենք բարձրացնում, դրանք մերժվում են, այդ ժամանակ չեն հիշում, որ մենք խորհրդարանական երկիր ենք, բայց երբ հիմա ասում ենք, որ ԱԺ-ում աշխատելով վատ օրինակ ենք ծառայում մարդկանց, որոնց ասել ենք՝ տանը մնացեք, դա դառնում է հերոսանալու առիթ, որ որոշ մարդիկ ասեն՝ ոչ, մենք կաշխատենք, մենք հերոսներ ենք: Այս մասին, այսօր՝ մարտի 25-ին, ԱԺ-ում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:
«Ես առաջարկում էի, որ Ազգային ժողովուր խորհուրդը, այսինքն ես, մյուս խմբակցությունների ղեկավարները, հանձնաժողովների նախագահները, փոխխոսնակները, ԱԺ նախագահը մնանք, մնացածը բոլորը գնան տուն, եւ անհրաժեշտության դեպքում հավաքվեն: Որեւէ հրատապ նախագիծ, որը կապված է մարդկանց կենսական խնդիրների հետ, այս երեք օրերին չի քննարկվելու: Միակ կարեւոր բանը կառավարության հետ հարցուպատասխանն է լինելու»,-ասաց նա:
Մարուքյանը նկատեց, որ երբ մարդկանց ասում ես մի հավաքվեք, բայց իրենք հավաքվում են, մարդիկ էլ անլուրջ են վերաբերվում:
