Հիմա հեշտ է ամեն բան առաջարկել, որ ամեն անկյունում մարդ կանգնի եւ բոլոր անցնողներին գումար բաժանի, ոչ մեկ, որեւէ բան չվճարի, կումունալ վճար չանի։ Այս մասին այսօր՝ մարտի 25–ին, ԱԺ–ում լրագրողների հետ ճապազրույցում ասաց ԱԺ փոխնախագահ Ալեն Սիմոնյանը՝ պատասխանելով լրագրողների այն դիտարկմանը, որ օրինակ Էդմոն Մաուքյանն առաջարկում է, որ Կառավարությունը փախհատուցի օրավարձով աշխատողներին, որոնք այսօր հացի խնդիր ունեն։
«Ինչ հնարավոր է, ինչ ներում է կառավարությունն անելու է առանց Էդմոն Մարուքյանի առաջարկի, առանց որեւէ մեկ այլ առաջարկի։ Արել է, անում է եւ շարունակելու է անել»,-ասաց նա:
Սիմոնյանի խոսքով՝ իշխանությունը գործում է ըստ օրվա եւ ժամի իրավիճակի հրամայականի. «Երբ որ շատ սահմանափակումներ են մտցվում, ասում են՝ բա տնտեսությունը, բա այս հարցը, այն հարցը, բա այս մարդիկ։ Քիչ սահմանափակում են մտցնում, ասում են՝ բա հեսա մարդիկ կմեռնեն, այս կլինի, այն կլինի։ Վստահ կարող եմ ասել ու յուրաքանչյուրի հետ կարող եմ վիճել այդ հարցի շուրջ, որ Հայաստանն այսօր, համաշխարհային այս իրավիճակում ամենալավ վիճակում է գտնվում եւ ամենաշուտ արձագանքող եւ ամենաքիչ տուժած երկրներից է»։
Լրագրողի ճշտող հարցին այնուամենայնիվ իշխանությունը օրավարձով աշխատող քաղաքացիներին ձեռք կմեկնի՞, եթե սոված մնալու խնդիր լինի, Ալեն Սիմոնյանը պատասխանեց. «Աշխարհի տնտեսությունն ամենայն հավանականությամբ փլվելու է եւ աշխարհում հնարավոր է ունենանք իրավիճակ, որն ավելի վատ լինի քան 2008 թվականի ճգնաժամը, որն իր հետեւանքը թողեց։ Սա համաշխարհային աղետ է, ժանտախտ է տիրում։ Ասել, իսկ օրինակ օրավարձով աշխատողնե՞րը. իսկ օրավարձով բնակարաններ վարձով տվողները, որոնք շատ–շատ են, որոնք բնակարաններ են վերցնում եւ օրավարձով տուրիստների համար տալիս են, իսկ այն մարդիկ, որ շինարարության վրա են աշխատում։ Պետք է անենք ամեն ինչ, որ մաքսիմալ հարվածը բոլորի համար մեղմացնենք»։
Իսկ պետությունն այդքան ներուժ ունի՞ հարցին, էլ պատասխանեց. «Այս պահի դրությամբ ունի, որովհետեւ վերջին 2 տարվա ընթացքում պաշտոնյաները բյուջեից փող չեն գողացել, բյուջեն գերակատարվել է մարդիկ ավելի պատասխանատու են եղել, հասկանալի պատճառներով, որովհետեւ վստահել են իրենց եւ իրենց պետությանը։ Ավելի շատ ՀԴՄ կտրոն է խփվել, ավելի շատ հարկ է մուտքագրվել ու փառք աստծո, որ մենք այս արհավիրքին եկանք այդ բագաժն ունենալով հանդերձ, որովհետեւ ես պատկերացնում եմ, որ ՀՀ–ում հեղափոխություն եղած չլիներ կամ այն վիճակում լինեինք, որ 2 տարի առաջ էր, նման արհավիրքի առջեւ կանգնեինք, ի՞նչ էինք անելու»։
