Բոլորը հասկանում են, որ ապատեղեկատվության դեմ պետք է պայքարել, բայց համացանցը ամբողջությամբ բաց է եւ հասանելի: Այս մասին մարտի 26-ին լրագրողների հետ զրույցում ասաց «Լուսավոր Հայաստան» կուսակցության պատգամավոր Անի Սամսոնյանը:
Նրա խոսքով` այնտեղ հեշտությամբ հնարավոր է հանդիպել անհայը աղբյուրների, որոնք եւս կարող են ապատեղեկատվության տարածման տարր դառնալ: «Եվ նրանց նույնիսկ տուգանել հնարավոր չէ, քանի որ դրա համար նրանց դեռ պետք է գտնել: Այսինքն, եթե ինչ-որ մեկը ցանկանում է միտումնավոր կերպով ապատեղեկատվություն տարածել, ապա այդ նպատակը կիրականացնեն այն աղբյուրներից, որոնք դժվար է նույնականացնել»,- պարզաբանեց Սամսոնյանը:
Նման դեպքերում, ինչպես նշեց պատգամավորը, կարող են տուժել այն ԶԼՄ-ները, որոնք բարեխղճորեն կատարում են իրենց աշխատանքը` նշելով, որ այն երկրները, որոնք հրաժարվել են գրաքննություն մտցնել, հաշվի են առել այս հանգամանքը: «Ի վերջո, ժամանակակից աշխարհում այդ տեղեկատվական հոսքերը դժվար է կարգավորել»,- արձանագրել է խորհրդարանականը:
Պատգամավորը կարծում է, որ լրատվամիջոցների գործունեության նկատմամբ կոշտ միջոցառումներն ու սահմանափակնորը կարող են բացասաբար անդրադառնալ Հայաստանի միջազգային վարկանիշի վրա: «Լրատվամիջոցներն իրենց աղբյուրներն ունեն: Իրենց աղբյուրներ ունեն ոչ միայն խորհրդարանն ու կառավարությունը:
Եթե պարետը լրատվամիջոցներին սահմանափակում է միայն պաշտոնական տեղեկատվության առումով, ապա նա պարտավոր է աշխատել եւ համագործակցել նրանց հետ, որպեսզի նրանց տեղեկատվության աղբյուրները նույնպես հստակեցվեն եւ, անհրաժեշտության դեպքում, հանրայնացվեն: Այսինքն, պարզապես վերցնել եւ հայտարարել, որ, վերջ, դուք այլեւս տեղեկատվություն չեք հրապարակում, դա կարող է ավելի մեծ խուճապ առաջացնել, քան եթե այդ տեղեկատվությունը հրապարակվեր»,- եզրափակեց Անի Սամսոնյանը:
Հիշեցնենք, որ իշխանությունները, արտակարգ դրություն հայտարարելով, ԶԼՄ-ներին պարտավորեցրել են միայն պաշտոնական տեղեկատվություն տարածել կորոնավիրուսի մասին: