Պերուի իշխանությունները բնակիչներին կոչ են արել դադարեցնել չղջիկների որսը, որոնց ոչնչացնում են՝ ենթադրելով, որ դրանք կորոնավիրուս են տարածում, հայտնում է Nat-geo-ն։
Անցյալ շաբաթ Վայրի անտառների եւ ֆաունայի ազգային գործակալության (SERFOR) աշխատակիցներին հաջողվել է փրկել մոտ 200 չղջիկների, որոնց Կախամարկա հյուսիսային շրջանի գյուղացիները բռնել եւ ցանկացել են այրել։ Կենդանիներին բռնագրավել եւ բաց են թողել բնակավայրից հեռու քարանձավում։
Բնակիչները հարձակվել են չղջիկների վրա, քանի որ կարծել են, թե նրանք կորոնավիրուս են տարածում, հայտարարել են գործակալությունում։ SERFOR-ում բացատրել են, որ չղջիկները կարող են օգտակար լինել մարդկանց համար, քանի որ նրանց տեսակների 70 տոկոսը միջատներով է սնվում, այդ թվում՝ գյուղատնտեսության համար վնասակար, ինչպես նաեւ դենգե վիրուս եւ այլ հիվանդություններ տարածող միջատներով։
Կազմակերպությունում խորհուրդ են տվել սննդի մեջ չղջիկի կամ այլ վայրի կենդանու միս չօգտագործել։
Գիտական աշխարհում համընդհանուր ճանաչում ունի այն փաստը, որ SARS-CoV-2-ը մարդուն չղջիկներից է անցել, սակայն միջնորդի միջոցով, որը կարող էր օձ կամ պանգոլին լինել։