Վրաստանում հայտարարված արտակարգ դրությունից եւ գործող սահմանափակումներից ելնելով, Վիրահայոց թեմը հոգեւոր ծիսակատարությունները եւ արարողությունները կիրականացնի փոփոխված ձեւաչափով: Այս մասին հայտարարել է Վիրահայոց թեմի առաջնորդական տեղապահ Կիրակոս վարդապետ Դավթյանը՝ հատուկ տեսաուղերձի միջոցով: Այս մասին հայտնում է 1tv.ge-ն:
Ինչպես նշվում է ուղերձում, թեմի պաշտոնական կայքէջում եւ ֆեյսբուքյան էջում կտեղադրվի կիրակնօրյա Սուրբ Պատարագների խորհուրդների քարոզչությունը, որը կներկայացնի Վիրահայոց թեմի առաջնորդը:
«Ծաղկազարդի տոնի, Ավագ շաբաթվա բոլոր օրերի խորհուրդները եւ Հիսուս Քրիստոսի հրաշափառ Հարությանը նվիրված արարողությունները, նույնպես կկատարվեն եկեղեցիներում, փակ վիճակում, որոնց հավատացյալները կարող են ունկնդրել եկեղեցու մերձակա տարածքում՝ բարձրախոսների միջոցով կամ դիտել տանը առցանց՝ ուղիղ հեռարձակմամբ»,- հայտարարել է Կիրակոս վարդապետ Դավթյանը:
Վիրահայոց թեմի առաջնորդի տեղապահը վիրահայերին կոչ է արել, պահպանել հանգստություն եւ աղոթել տանը: