News
Լրահոս
News
Հինգշաբթի
Մարտ 28
Տեսնել լրահոսը


Կորոնավիրուսից Հայաստանում մարդ է մահացել: Առողջապահության նախարարության մամուլի խոսնակ Ալինա Նիկողոսյանն իր ֆեյսբուքյան էջում գրել է, որ «Նորք» ինֆեկցիոն կլինիկական հիվանդանոցում արձանագրվել է մահվան դեպք։ 72-ամյա պացիենտն ունեցել է կորոնավիրուսային, ինչպես նաև երկկողմանի թոքաբորբ, սրտի ռիթմի խանգարում եւ այլ հիվանդություններ։  Հայաստանում մարտի 26-ի ժամը 10-ի դրությամբ կորոնավիրուսով վարակվել է 290 մարդ, նրանցից  18-ն առողջացել են:

Գյումրում 74-ամյա տղամարդ է մահացել, որի մոտ շնչառական հիվանդություն է եղել։ Ըստ մամուլում հրապարակումների՝ տղամարդու մոտ կորոնավիրուս է կասկածվում, սակայն մահվան հստակ պատճառը պարզ կդառնա դիահերձումից հետո միայն։

Երեք զինծառայողի մոտ կորոնավիրուս է ախտորոշվել։ Նրանցից մեկի ընտանիքի անդամի մոտ ավելի վաղ էր հաստատվել վիրուսի առկայություն: Դրանք  փոխկապակցված են և առնչվում են երկրում գրանցված առաջնակի դեպքերի օջախներից մեկի հետ: Զինծառայողները նախապես եղել են մեկուսացված, այժմ  հոսպիտալացված են, նրանց առողջական վիճակը բավարար է: Պաշտպանության նախարար Դավիթ Տոնոյանը հավաստիացրել է, որ զինվորականներին բարձրորակ բուժօգնություն է ցուցաբերվում, նրանց կյանքին վտանգ չի սպառնում: Առաջնագծից  հեռու գտնվող նրանց զորամասում հայտարարված է զորանոցային դրություն, ձեռնարկված են ամենախիստ հակահամաճարակային միջոցառումները։ Պաշտպանության բանակում առայսօր կորոնավիրուսի դեպք չի արձանագրվել:

Եթե Հայաստանում լինեն կորոնավիրուսով հիվանդացության այնպիսի պիկեր, ինչպես Իտալիայում կամ Իրանում, դա աղետ կլինի՝ թե՛ առողջապահության համակարգի համար, թե՛ հումանիտար իմաստով, լրագրողների հետ զրույցում ասել է  առողջապահության նախարարը: Արսեն Թորոսյանի խոսքով՝ երկրում հիվանդացության աճի ներկայիս տեմպերը կարելի է բարեհաջող համարել: Էրեբունիի եւ Չարենցավանի արտադրամասերից մի քանի հարյուր մարդ է մեկուսացվել: Սակայն չի կարելի պնդել, որ հայտնաբերվել եւ մեկուսացվել են նրանց հետ շփված բոլոր պացիենտները:

Ըստ Արսեն Թորոսյանի՝ կորոնավիրուսի ամենամեծ թվով դեպքեր են գրանցվել Երեւանում, Արմավիրում, Արարատում եւ Կոտայքում: Սյունիքում, Շիրակում եւ Լոռիում գրանցվել են վարակման եզակի դեպքեր, Վայոց ձորում եւ Գեղարքունիքում, վերջին տեղեկություններով, գրանցված դեպքեր չեն եղել:

Առողջապահության նախարարի խոսքով՝ կորոնավիրուսով պացիենտների հետ աշխատող որոշ բժիշկներ տուն չեն գնում, քանի որ իրենց համարում են ռիսկի խումբ եւ վախենում են իրենց հարազատներին վարակելուց: Նրանց կենցաղային խնդիրները լուծում է նախարարությունը:

Կան նաեւ վարակված բուժաշխատողներ: Կորոնավիրուս է հայտնաբերվել բժշկի եւ շտապօգնության վարորդի մոտ: Ավելի վաղ վիրուսը հայտնաբերվել էր նաեւ «Նորք» ինֆեկցիոն հիվանդանոցում աշխատող բուժքրոջ մոտ: Ըստ Արսեն Թորոսյանի՝  բուժաշխատողների վարակումը երբեմն անխուսափելի է:

Մենք այսօր հիվանդանոցային հնարավորությունները ճիշտ կառավարելու խնդիր ունենք. այսօր հիվանդանոցներում կան պացիենտներ, որոնք որեւէ բուժում չեն ստանում, կառավարության նիստում հայտարարել է վարչապետ Նիկոլ Փաշինյանը: Նրա խոսքով՝ պետք է բանակցել հյուրանոցների հետ՝ մատչելի գնով պայմանավորվելու համար:

Մարտի 26-ին ժամը 9-ից 12-ը մեկուսացման կամ ինքնամեկուսացման կանոնները կամ ազատ տեղաշարժվելու իրավունքի այլ սահմանափակումները խախտելու փաստերով 172 անձի նկատմամբ ոստիկանությունը կազմել է վարչական իրավախախտման վերաբերյալ արձանագրություն, իսկ Պարետի որոշումն ուժի մեջ մտնելուց հետո մինչեւ մարտի 26-ի ժամը 12-ը՝ 458 անձի նկատմամբ։ Ոստիկանությունը  նորից հորդորել է բնակչությանը սահմանափակել տնից դուրս գալը, վարորդներին էլ՝ տեղափոխել միայն մեկ ուղեւորի։

Արցախի նախագահի թեկնածու, Արցախի հերոս Վիտալի Բալասանյանը բաց նամակով դիմել է Արցախի Հանրապետության նախագահ Բակո Սահակյանին, կոչ անելով հանրապետությունում հայտարարել արտակարգ դրություն:

Կառավարությունը կորոնավիրուսի տնտեսական հետեւանքների չեզոքացման 5 միջոցառում է նախատեսել, որոնցից մեկը վերաբերում է գյուղոլորտին:

Մեկ այլ միջոցառում էլ առնչվում է փոքր բիզնեսին: Աջակցություն կտրամադրվի այն  ընկերություններին, որոնք ունեն 2-ից 50 աշխատակից: Միանվագ օգնության չափը որոշվելու է հետեւյալ կերպ. յուրաքանչյուր ամբողջական 5 աշխատակցի հաշվով յուրաքանչյուր հինգերորդ աշխատակցի միջին աշխատավարձի չափը վերադարձվելու է որպես դրամաշնորհ:

Իրանում կորոնավիրուսով վարակման դեպքերի թիվը մեկ օրում ավելացել է 2389-ով, մահացության դեպքերը` 157-ով: Վարակվածների ընդհանուր թիվն Իրանում  հասել է 29406-ի, նրանցից 10 457-ն ապաքինվել են:

Աշխարհում գրանցվել է կորոնավիրուսով վարակման 471 820 եւ դրա հետեւանքով մահվան 21.297 դեպք: Առողջացել է 114 703 հիվանդ: Նոր կորոնավիրուսն արդեն հայտնաբերվել է աշխարհի 198 երկրում:

ԱԺ «Լուսավոր Հայաստան» խմբակցության ղեկավար Էդմոն Մարուքյանը Facebook-ի իր էջում տեսանյութ է հրապարակել եւ գրել. «Գազն անջատում են՚, ապա ավելացրել Գեղարքունիքի մարզի Մարտունի քաղաքի բնակչի հասցեն:

«Գազպրոմ Արմենիայից»  NEWS.am-ին հայտնել են, որ մինչև ապրիլի 14-ը, այսինքն մինչեւ արտակարգ դրության ավարտը, ընկերությունը ձեռնպահ կմնա բնակիչ-բաժանորդների գազամատակարարումը դադարեցնելու գործընթացից:

ԲՀԿ-ական պատգամավոր Նաիրա Զոհրաբյանը լուսանկարներ է հրապարակել եւ հայտնել, որ մի քաղաքացի Արցախի փողոցում շանը կապել է իր մեքենայից ու քարշ է տալիս ասֆալտով: Ոստիկանները  հայտնաբերել են այդ քաղաքացուն ու բերման ենթարկել: Նաիրա Զոհրաբյանն, ի դեպ, նշել էր. «Պարոն Ոստիկանապետ, գտեք էս անասունին», ավելի ուշ՝ հեռացրել գրառումը:

ԱՄՆ դոլարի փոխարժեքը նախորդ օրվա համեմատ աճել է 1.31 դրամով ու հասել է 497.24 դրամի: Եվրոյի փոխարժեքն աճել է 6.59 դրամով ու կազմել 544.33 դրամ, բրիտանական ֆունտի փոխարժեքը նվազել է 1.02 դրամով ու կազմել 592.36 դրամ, իսկ ռուսական ռուբլու փոխարժեքը նվազել է 0.05 դրամով ու կազմել  6.35 դրամ։

Մարտի 27-ին Հայաստանում սպասվում է առանց տեղումների եղանակ: Օդի ջերմաստիճանը ցերեկային ժամերին կբարձրանա եւս 2-3 աստիճանով: Երեւանում եւս տեղումներ չեն լինի: Առաջիկա գիշերը Երեւանում կլինի +7+9, վաղը ցերեկը՝ +18+20

Տպել
Կարդացեք նաև
Ամբողջը
Ինչպե՞ս են հայերը Սպահանում դիմավորել Ամանորը
Իրանահայ համայնքը Իրանի ազգային փոքրամասնություններից ամենախոշորն է․․․
Լուրեր Հայաստանից ու աշխարհից «մեկ տողով»․ 28․05․2021
Առաջին անգամ Հանրապետության տոնին գլխավոր հանդիսավայրը փակ է եղել լրագրողների եւ քաղաքացիների համար…
Լուրեր Հայաստանից ու աշխարհից «մեկ տողով»․ 28․05․2021
Այսօր առավոտյան հերթական անգամ հայ հանրությունը փոթորկվեց սահմանից ստացված լուրից: Գեղարքունիքի սահմանային գոտում...
Լուրեր Հայաստանից ու աշխարհից «մեկ տողով»․ 26․05․2021
Սյունիքում երեկ հերթական բախումն է տեղի ունեցել հայ զինծառայողների եւ Հայաստանի տարածք ներխուժած ադրբեջանցի զինվորականների միջեւ...
Լուրեր Հայաստանից ու աշխարհից «մեկ տողով»․ 25․05․2021
Երեկվանից սկսած Հայկական զինուժը երեք կորուստ ունի, որոնցից մեկը՝ մարտական...
Լուրեր Հայաստանից ու աշխարհից «մեկ տողով»․ 24․05․2021
Վերջին օրերին լուրեր էին շրջանառվում, որ 44-օրյա պատերազմի օրերին Ջրականից նահանջելիս 160 հայ զինվոր անցել...
Ամենաշատ