Փորձում են կոտրել ՖԲ էջս․ էջիցս հեռացվել են Մանե Գևորգյանի, Հովիկ Աղազարյանի և մարզպետի մասին գրառումները։ Այս մասին Ֆեյսբուքի իր էջում գրել է Politik.am կայքի գլխավոր խմբագիր Բորիս Մուրազին։
Հիշեցնենք, որ ավելի վաղ Բ․Մուրազին գրել էր, թե վարչապետի մամուլի խոսնակը սպառնացել է ոստիկաններ ուղարկել իրենց տուն։
Բորիս Մուրազիի խոսքով՝ այն բանից հետո, երբ իրենք հրապարակել են տեղեկատվություն, որտեղ նշվում է, որ Գյումրիում մահացել է 70-ամյա տղամարդ, ում մոտ կորոնավիրուս է կասկածվում, ինքը զանգ է ստացել վարչապետի մամուլի խոսնակ Մանե Գեւորգյանից։
«Ինձ հետ կապվում է Մանե Գեւորգյանը եւ շատ բարկացած տոնով խոսում է, ես Մանե Գեւորգյանին առաջարկում եմ փոխել տոնն ինձ հետ խոսելուց եւ ասում եմ՝ մենք պատրաստ ենք օրենքով սահմանված պահանջներն իրականացնենք։ Մանե Գեւորգյանն ինձ ասում է՝ ինքը կարող է ինձ 500 հազար տուգանել։ Ես իրեն բացատրում եմ, որ ինքն ինձ տուգանելու լիազորություն չունի։ Մանե Գեւորգյանը հրաժարվում է նաեւ ուղարկել պարետատան պաշտոնական հերքումը՝ ասելով՝ դե որ էդպես է, եթե օրենքով ենք շարժվում, ուրեմն ձեզ մոտ կգան ոստիկաններ եւ կապահանջեն, որ նյութը հեռացնեք»,- ֆեյսբուքյան իր էջում հրապարակված տեսանյութում պատմել է Բորիս Մուրազին։
