ՀՀ տարածքային կառավարման եւ ենթակառուցվածքների նախարարությունը մթերային հաստատություններին եւ կազմակերպություններին կոչ է անում խնդիրների ծագման դեպքում, օրինակ՝ մարզերից իրենց աշխատակիցներին Երեւան տեղափոխելու հետ կապված, դիմել նախարարությանը: Այս մասին մարտի 27-ին կառավարությունում մամուլի ասուլիսի ժամանակ ասաց ՀՀ տարածքային կառավարման եւ ենթակառուցվածքների փոխնախարար Արմեն Սիմոնյանը:
Մասնավորապես, փոխնախարարից հետաքրքրվեցին, թե ինչ պետք է անեն տվյալ կազմակերպությունների աշխատակիցները, որոնք մարզերում են բնակվում եւ ստիպված են ամեն օր Երեւան հասնել, այն դեպքում, երբ մի շարք մարզերից հասարակական տրանսպորտը չի աշխատում, իսկ ավտոմեքենայով 2 անձից ավելի փոխադրումներն արգելված են պարետի նոր պահանջներով: Նման դեպքերում մարդիկ ստիպված են վճարել տաքսիով փոխադրման համար:
«Մենք մարդկանց փոխադրման հարցով որեւէ բողոք կամ հայտարարություն չենք ստացել: Նման խնդիրների դեպքում թող դիմեն նախարարությանը: Մենք կփորձենք այդ խնդրին լուծում տալ»,-ասաց Սիմոնյանը:
Հիշեցնենք, որ Հայաստանում մարտի 16-ից ապրիլի 14-ը արտակարգ դրության ռեժիմ է գործում:
