Լեհաստանի նախագահ Անաջեյ Դուդան չի բացառել երկրի նախագահի հերթական ընտրությունների ժամկետի հետաձգումը նոր կորոնավիրուսի տարածման պատճառով, հաղորդում է ՏԱՍՍ-ը։
«Ընտրությունների օրը նշանակված է, եւ մեզնից որ մեկը չգիտի՝ ինչ կկատարվի իրականում մայիսի 10-ին»,-շաբաթ Լեհական հեռուստատեսության եթերում ասել է Դուդան։
«Եթե համաճարակը ավելի մեծ ուժով տարածվի եւ մենք շարունակենք պահպանել ներկայիս սահմանափակումները, որոնք գործում են ներկա պահին, ապա ես կարծում եմ, որ ընտրությունների ժամկետներն անհնար կլինի պահպանել»,-խոստովանել է նա։
Լեհաստանում նախագահական ընտրությունների առաջին փուլը պետք է կայանա մայիսի 10-ին։ Կորոնավիրուսի պատճառով ընտրարշավն արդեն մի քանի շաբաթ է փաստացի սառեցվել է։ Բազմաթիվ քաղաքական գործիչներ եւ, ըստ հարցումների արդյունքների, Լեհաստանի բնակիչների ավելի քան 70 տոկոսը համարում է, որ այդ պայմաններում անհրաժեշտ է հետաձգել ընտրությունները։
Լեհաստանում կորոնավիրուսով վարակվածների թիվը հասել է 1717-ի, մահացել է 19 մարդ։ Վարակի տարածումը կանխելու համար Լեհաստանի իշխանությունները սահմանել են համաճարակի ռեժիմ, փակել սահմաններն օտարերկրացիների համար եւ հանրապետություն մուտք գործած բոլոր քաղաքացիներին տեղավորում են 14-օրյա կարանտինում։ Երկրում փակ են բոլոր կրթական, մշակութային եւ սպորտային հաստատությունները, ռեստորանները, առեւտրի կենտրոնները, բացառությամբ մթերային խանութների եւ դեղատների։ Հանրապետության բնակիչներին արգելվում է տնից դուրս գալ առանց խիստ անհրաժեշտության եւ տեղաշարժվել ավելի քան երկու հոգանոց խմբերով։
