Տպավորություն է, որ մենք ունքը շտկելու փոխարեն հիմա կարող է աչքը հանենք: Այս մասին ԱԺ-ում համաճարակի հետևանքով անձնական տվյալների պաշտպնության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին միջամտելու մասին նախագծի քննարկման ժամանակ նշեց անկախ պատգամավոր Արման Բաբաջանյանը:
Նրա խոսքով, պետությունն իհարկե քաղաքացիների առողջության երաշխավորն է, բայց պետությունը նաեւ ազատությունների եւ ժողովրդավարության երաշխավորն է:
«Այստեղ ԱԺ-ն պետք է չափազանց աչալուրջ լինի: Նախագծով ռաջարկվող կարգավորումները նախատեսում են բարձր աստիճանի միջամտություն մարդու իրավունքներին, ուստի դրանք պետք է առավելագույն հստակություն ունենան: Կառավարության բացարձակ հայեցաղության վրա թողնել այս հարցը, անընդունելի է: Օրենքը առնվազն պետք է սահմանի իրավասու մարմինների շրջանակը, իսկ կառավարությունը յուրաքանչյուր դեպքում՝ որոշի պատասխանատուներին: Սա է ձեր առաջարկը: Բացի դրանից պարզ չէ, թե ինչ է նշանակում «կառավարության որոշմամբ սահմանված մարմիններին եւ անձանց» ձեւակերպումը: «Անձանց» բառը պետք է փոխարինվի պաշտոնատար անձանց բառերով կամ հանվի առհասարակ:
Ես համաձյն եմ պարոն տարոն Սիմոնյանի վկայաբերած միջազգային իրավակարգավորումների վերաբերյալ այն անհայտ օրինակներին, որոնց դուք անդրադարձաք, բայց դրանք, ըստ էության, բացակայում են առհասարակ»,-ասաց պատգամավորը:
Նրա խոսքով, նախագծում բաց է նաեւ որոշումների վերանայումների մեխանիզմի հարցը, այդ թվում կապված դատական պաշտպանության իրավունքի հետ: «Օրինակ, եթե անձը գտնում է, որ իր նկատմամբ մեկուսանալու պահանջը ապօրինի է, ինչպե՞ս է բողոքարկելու: Քանի որ խոսքն ազատությունից զրկված լինելու կարգավիճակի մասին է, ուստի նաեւ պետք է ազատ արձակման եւ վիճարկման անհրաժեշտ կանոնները գործեն»:
