Նույնիսկ ներկայիս պայմաններում արժեքավոր բիզնեսը չի կարող փակվել: Այս մասին մարտի 30-ին լրագրողների հետ հանդիպման ժամանակ ասաց փոխվարչապետ Մհեր Գրիգորյանը:
Նա հավելեց, որ եթե այսպիսի կարճ ժամանակահատվածում բիզնեսը կարելի է լուծարել, ապա դա կասկածներ է հարուցում այն մասին, որ ստեղծված իրավիճակը միայն առիթ է, որ տնտեսվարողն իր գործը փակի: «Ցանկացած միջոցառում, նույնիսկ սոցիալական, կրելու է միայն ձեւական բնույթ, եթե ուղղված չէ զարգացմանը: Դրամաշնորհների ու սուբսիդիաների տեսքով տնտեսական օգնությունը արդյունավետ է միայն կարճաժամկետ հեռանկարում: Բիզնեսին աջակցությունը պետք է ուղղված լինի զարգացմանը, այլ ոչ թե գոյատեւմանը»,- նշեց պաշտոնյան:
Գրիգորյանը հավաստիացրեց, որ իշխանությունները շուտով կհայտարարեն, թե փոքր բիզնեսի որ սուբյեկտներին են հասանելի լինելու արտոնյալ վարկերը: «Առաջարկված միջոցառումների սուբսիդավորման եւ համաֆինանսավորման ծրագրերի տոկոսադրույքները հազիվ թե 6 տոկոսից ավելի լինեն: Ըստ գյուղատնտեսության աջակցության ծրագրի տոկոսադրույքը առավելագույնը լինելու է 14 տոկոս»,- պարզաբանեց նա:
Փոխվարչապետի խոսքով՝ պետության գործողությունները պետք է լինեն համընդգրկուն, հաշվի առնելով, որ կա բժշկական վերազինման, բնական ապրանքաշրջանառության ապահովման եւ այլ խնդիրներ: «Առայժմ Հայաստանի Կառավարության, ինչպես նաեւ աշխարհի մյուս կառավարությունների որոշ որոշումներ կրում են նաեւ իրավիճակային բնույթ»,- ամփոփեց Մհեր Գրիգորյանը: