Ֆրանսիայում բարձրացրել են կորոնավիրուսի համավարակի պատճառով հայտարարված կարանտինը կրկնակի խախտելու տուգանքը, հաղորդում է RFI-ը։ Ըստ վարչապետ Էդուար Ֆիլիպի, արդարադատության նախարար Նիկոլ Բելուբեի եւ Անդրծովյան տարածքների նախարար Անիք Ժիրարդենի ստորագրած որոշման՝ կարանտինը կրկնակի խախտելու տուգանքը, որը կատարվել է առաջին խախտումից 15 օրվա ընթացքում, այսուհետ կազմում է 200 եվրո (135-ի փոխարեն)։
Դրա վճարումն ուշացնելու դեպքում գումարը հասնում է 450 եվրոյի (375-ի փոխարեն)։
Ընդ որում՝ առաջին անգամ կարանտինը խախտելու համար նախատեսված տուգանքը մնացել է անփոփոխ՝ 135 եվրո։
30 օրվա ընթացքում կատարված չորս խախտման համար սպառնում է 3750 եվրոյի չափով տուգանք եւ մինչեւ 6 ամիս տեւողությամբ կալանավորում, պարզաբանում է francetvinfo-ը։
Ֆրանսիայում կարանտինը գործում է արդեն շուրջ երկու շաբաթ՝ մարտի 17-ից։ Այն կպահպանվի առնվազն մինչեւ ապրիլի 15-ը։
Կարանտինի կանոններով՝ պետք է լրացնել հատուկ ձեւաթուղթ, որը հասանելի է ՆԳՆ կայքում՝ նշելով տնից դուրս գալու ժամն ու պատճառները։
Մարտի 27-ին Ներքին գործերի նախարար Քրիստոֆ Կաստաները հայտարարել է, որ ոստիկանության եւ ժանդարմերիայի աշխատակիցները ստուգման նպատակով կանգնեցրել են շուրջ 3.7 միլիոն մարդու եւ դուրս գրել ավելի քան 225 հազար տուգանք։
