Բոլորս հասկանում ենք, որ այս համաճարակից հետո Հայաստանը լինելու է նոր իրավական իրականության մեջ, եւ վիճարկելի չէ այն հարցը, որ մարդու իրավունքների սահմանափակման կոնցեպտը նույնպես փոփոխությունների է ենթարկվելու եւ արդեն իսկ ենթարկվում է: Այս մասին, այսօր՝ մարտի 30-ին, ԱԺ-ում «Արտակարգ դրության իրավական ռեժիմի մասին» օրենքում լրացումներ կատարելու վերաբերյալ նախագծի քննարկման ժամանակ նշեց «Իմ քայլը» խմբակցության պատգամավոր, Պետաիրավական հարցերի հանձնաժողովի նախագահ Վլադիմիր Վարդանյանը:
«Ես մշտապես եղել եմ, կամ եւ կմնամ պանդեմիայի դեմ պայքարի ավելի կոշտ միջոցների կիրառման կողմնակից, բայց միջոցառումը պետք է լինի կոշտ եւ արդյունավետ: Եթե այն միայն կոշտ է, ապա չի համապատասխանում այն չափանիշերին, որոնք նախատեսվում են իրավական նորմերով Սահմանադրությամբ ստանձնած միջազգային պարտավորությանը:
Հարգելի գործընկերներ, չեմ բացառում, որ ինչ-որ փուլում այլեւս անհրաժեշտ լինի օգտագործել հեռահաղորդակցության միջոցները, որը պետք է օգտագործվի՝ որպես վերջին հնարավորություն: Հասե՞լ ենք այդ փուլին, ես չգիտեմ, ես այդ մասնագետը չեմ»,-ասաց Վարդանյանը:
Նա անդրադարձավ նաեւ կորոնավիրուսով վարակվածներին՝ նշելով. «Ժողովուրդ ջան, կորոնավիրուսով վարակվածները հանցագործներ չեն, նրանք չեն ուզում թաքցնել ինչ-որ բան, գողոնը չեն տանում, որ ինֆորմացիա չկարողանան փոխանցել:
Պաշտոնապես հայտարարում եմ, որ պատկան մարմիններն իրավունք ունեն իմ վերաբերյալ ցանկացած տեղեկատվություն հանգիստ ուսումնասիրել, տալիս եմ իմ համաձայնությունը: Գուցե մենք այս փուլն էլ պետք է անցնենք, նոր գնանք առաջ»,- եզրափակեց Վլադիմիր Վարդանյանը:
