News
Լրահոս
News
Երկուշաբթի
Հունվար 25
USD
518.44
EUR
631.1
RUB
6.95
ME-USD
0.01
Տեսնել լրահոսը

Եթե անգամ ընդունենք, որ իշխանությունների նպատակն անկեղծ է, ու նրանք ուզում են այս օրինագծով խոչընդոտել կորոնավիրուսի տարածմանը, ապա բացարձակապես համոզիչ չի թվում, որ այդ օրենքի ընդունմամբ պայքարն ավելի արդյունավետ է լինելու: Այս մասին 168.am-ի ն ասել է իրավապաշտպան Ավետիք Իշխանյանը:

Հիշեցնենք, որ այսօր Ազգային ժողովն առաջին ընթերցմամբ ընդունել է «Արտակարգ դրության իրավական ռեժիմի մասին» ՀՀ օրենքում լրացումներ և փոփոխություններ կատարելու մասին նախագիծը, որով նախատեսվում են արտակարգ դրության ընթացքում անձնական տվյալների պաշտպանության և հաղորդակցության ազատության իրավունքի սահմանափակման առանձին ընթացակարգեր: Դրանք կիրառելի են բացառապես համաճարակի հետևանքով առաջացած արտակարգ իրավիճակի հիմքով հայտարարված արտակարգ դրության ընթացքում, մասնավորապես` հանրային էլեկտրոնային հաղորդակցության ցանցի օպերատորների /Beeline, Vivacell, Ucom/ կողմից կառավարության նշած պետական մարմիններին և իրավաբանական անձանց հաճախորդի տեղորոշման, հաճախորդի հեռախոսահամարի հետ կապ ունեցած հեռախոսահամարների, հեռախոսային խոսակցություն սկսելու ամսաթվի, սկզբի և ավարտի վերաբերյալ տվյալների տրամադրում:

«Ինձ բոլորովին չի համոզում, որ այդ տոտալ վերահսկողությունը նպաստելու է կորոնավիրուսի տարածման խոչընդոտմանը, որովհետև հիմա բազմաթիվ երկրների օրինակներ կբերեն, բայց դա համոզիչ չէ, քանի որ այն երկրները, որոնք ամենաարդյունավետն են գործում կորոնավիրուսի տարածման դեմ, այլ եղանակներով են պայքար մղում»,- ասել է Ավետիք Իշխանյանը` հավելելով, որ այդ երկրներից, օրինակ, Գերմանիան, Հարավային Կորեան ու Չինաստանը  գնացել են վարակի տարածման օջախների մեկուսացման, ուժեղ վերահսկողություն իրականացնելու և, ամենակարևորը, հսկայական թվով թեստավորումներ իրականացնելու ճանապարհով ու հաջողել են:

Իրավապաշտպանի խոսքով՝  այդ անհեթեթ օրինագիծն իրականում շրջանառության մեջ է դրվել այլ նպատակներով:

«Եթե սա անկեղծ է, ապա ընդամենն անարդյունավետ է, բայց չեմ կարծում, որ այդ աստիճանի պրիմիտիվ նախագիծ կներկայացնեին: Իշխանությունների ինտելեկտի մասին ես ավելի բարձր կարծիք ունեմ և կարծում եմ, որ այս առիթն օգտագործում են մարդկանց, և չի բացառվում՝ նաև քաղաքական ընդդմախոսների նկատմամբ տոտալ վերահսկողություն իրականացնելու համար: Սա ինձ հիշեցնում է Օրուելի «1984»-ը»,- ասել է Հայաստանի Հելսինկյան կոմիտեի նախագահը:

Ըստ Ավետիք Իշխանյանի՝ բավական չէր, որ  «Օպերատիվ-հետախուզական միջոցառումների մասին» օրենքում փոփոխություններ կատարեցին և Ոստիկանությանը հնարավորություն տվեցին վերահսկելու, հիմա էլ, օգտվելով այս իրավիճակից, կարծես թե ուզում են ավելի ընդլայնել մարդկանց ներքին կյանքին խառնվելու, ինֆորմացիային տիրապետելու հնարավորությունները:

Դիտարկմանը, թե նախագծով նախատեսվում է, որ արտակարգ իրավիճակով պայմանավորված՝ արտակարգ դրությունից հետո ըստ էության հավաքագրված ինֆորմացիան պետք է ոչնչացվի, և արդարադատության նախարար Ռուստամ Բադասյանն էլ այսօր ասել է, որ այդ տվյալներն այլ նպատակով օգտագործողների համար քրեական պատասխանատվություն է սահմանված, Ավետիք Իշխանյանը պատասխանել է, որ նախ հայտնի չէ, թե դեռ որքան կտևի արտակարգ դրությունը:

«Բացի դրանից, ես ի՞նչ երաշխիք ունեմ ու ինչո՞ւ պետք է հավատամ, որ այդ ինֆորմացիան իսկապես ոչնչացվելու է, ու այն չի օգտագործվելու ընդդեմ տարբեր գործիչների: Նախ՝ հիշենք մի կարևոր բանի մասին, որ Հայաստանում, որպես այդպիսին, իշխանությունների տարանջատում գոյություն չունի, և դա՝ ոչ միայն այս իշխանությունների ժամանակ: Ուղղակի այս իշխանությունները ժառանգեցին այդ համակարգը ու բացարձակապես չեն ուզում այն բարեփոխել: Ոստիկանությունը, Ազգային անվտանգության ծառայությունը և քննչական մարմինները նախկինի պես գտնվում են վարչապետի ենթակայության ներքո, ու նրա գվարդիաներն են հանդիսանում: Ուրեմն այս դեպքում, երբ նրանց վրա որևէ այլ վերահսկողություն չկա, ես ի՞նչ երաշխիք պիտի ունենամ…»,- ասել է իրավապաշտպանը:

Ավետիք Իշխանյանը հիշեցրել է նաև իր այն համոզմունքը, որ ժողովրդավարությունը հեղափոխականություն չէ:

«Ժողովրդավարական երկրում իշխող քաղաքական ուժը չի կարող ունենալ 50 տոկոսից ավելի ձայն: Այն առավելագույնը կարող է ունենալ 30-40 տոկոս ձայն: Եվ երբ հեղափոխության արդյունքում, որը դեռևս ժողովրդավարություն չէ, որևէ քաղաքական ուժ ստանում է 70 և ավելի տոկոս սահմանադրական մեծամասնություն, ապա այդ դեպքում, ինչպես հայտնի գործիչն է ժամանակին ասել, նրանց դեմ խաղ չկա»,- եզրափակել է Ավետիք Իշխանյանը:

Տպել
Կարդացեք նաև
Ամբողջը
Շվեդիան կփակի սահմանները Նորվեգիայի հետ կորոնավիրուսի «բրիտանական» շտամի պատճառով
Շվեդիայում մտահոգվում են, որ նորվեգական տասնյակ համայնքներում փակ խանութների, այդ թվում՝ ակլոհոլի վաճառքով զբաղվող, պատճառով Նորվեգիայի սահմանամերձ շրջանների բնակիչները կձգտեն դեպի Շվեդիա...
Սերբիայում հայտնաբերվել է կորոնավիրուսի «բրիտանական» շտամով վարակման առաջին դեպքը
Նրա խոսքով՝ երկիր է ժամանել կին, որի ՊՇՌ թեստի արդյունքը բացասական էր: Սակայն նրա ամուսնու մոտ ախտորոշվել է ծանր ընթացքով թոքաբորբ…
Գերմանիան ձեռք է բերել «հակամարմինների կոկտեյլի» հիմքով կորոնավիրուսի դեմ դեղամիջոց
Նրա խոսքով՝ երկիրն ընդամենը ծախսել է 400 միլիոն եվրո 200 հազար դեղաչափի համար…
ԵՄ-ում կորոնավիրուսի դեմ երրորդ պատվաստանյութը կարող է շուկայում հայտնվել արդեն հաջորդ շաբաթ
Մենք հույս ունենք, որ առաջիկա շաբաթվա ընթացքում պատվաստումների արշավն ավելի արագ տեմպերով կընթանա...
Իտալիայի խոշորագույն շրջաններից մեկում սխալմամբ կարանտին են սահմանել
Այդ հարցը հանգեցրել է շրջանների եւ կառավարության միջեւ վեճի այն մասին, թե ով է թույլ տվել սխալը…
Իրանը երկարաձգել է Մեծ Բրիտանիայի հետ ավիահաղորդակցության արգելքը կորոնավիրուսի նոր շտամի պատճառով
Նա նաեւ հայտարարել է, որ Իմամ Խոմեյնիի անվան միջազգային օդանավակայանում չեն ընդունել ուղեւորներին, իսկ Իրանի «Իրանական ավիաուղիներ» ավիափոխադրողը չի իրականացնի չվերթներ դեպի Լոնդոն...
Ամենաշատ