Ստեփանակարետի 1/32 ընտրատարածքում այսօր՝ մարտի 31-ին՝ ժամը՝ 10:00-ին, իր քաղաքացիական պարտքն է կատարել «Վերածնունդ» կուսակցության կողմից առաջադրված ԱՀ նախագահի թեկնածու Հայկ Խանումյանը:
Քվեարկել եմ հանուն իրական փոփոխությունների: Ցանկանում եմ տեսնել այնպիսի Արցախ, որը կկարողանա դիմակայել բոլոր մարտահրավերներին»,- այս մասին լրագրողների հետ զրույցում նշեց Հայկ Խանումյանը:
«Շատ կարեւոր է, որ մեր տնտեսությունը լինի այնպիսին, որ բոլոր ֆորսմաժորային իրավիճակներին կարողանա պատասխան տալ: Ցավոք սրտի, այս տարիների ընթացքում չենք կարողացել ստեղծել նման տնտեսություն եւ պետություն, որն իր ինստիտուտներով ի վիճակի լինի ֆորսմաժորային իրավիճակներից առավել արդյունավետ դուրս գա»,- ընդգծեց Խանումյանը:
Նա նկատեց, որ պետք էր ընտրությունները հետաձգել կամ չեղարկել, բայց իշխանությունն այս անգամ էլ անգործության է մատնված. «Ես չգիտեմ, արդյոք պաշտոնական Երեւանն ուներ համապատասխան լծակ ճնշելու այս մասով: կարծում եմ՝ համապատասխան կամք չեն ունեցել այդ ամենը ավելի կոպիտ տոնով Ստեփանակերտին ասելու»:
Ըստ Խանումյանի՝ համապետական ընտրություններին Արցախի նախագահի բոլոր թեկնածուների եւ կուսակցությունների համար ֆորմալ առումով ստեղծվել են հավասար պայմաններ: Ընտրությունների համար բավականին մեծ գումարներ են ծախսվել, որն աննախադեպ է Արցախի պատմության եւ Հարավային Կովկասի համար:
