Ներկայացված օրենսդրական փաթեթը չի երաշխավորում, որ մենք կարող ենք մարդկային կյանքեր փրկել: Այս մասին Ազգային ժողովի արտահերթ նիստին «Արտակարգ դրության իրավական ռեժիմի մասին» օրենքում եւ հարակից օրենքներում փոփոխություններ կատարելու մասին օրինագծերի փաթեթի երկրորդ եւ վերջնական ընթերցմամբ արագացված ռեժիմով քննարկման ժամանակ ասաց «Լուսավոր Հայաստան» կուսակցության խորհրդարանական խմբակցության քարտուղար Գեւորգ Գորգիսյանը:
Ըստ պատգամավորի` սրանք շատ ուշացած միջոցառումներ են: «Սա շատ վատ ֆիլտր է, շատ ուշացած միջոցառումներ են: Այս մեխանիզմի կիրառմամբ մենք ի վիճակի չենք լինի կազմակերպել վարակված անձանց հետ շփման մեջ եղած քաղաքացիների հայտնաբերումը: Օրենքի նախագիծը, կյանքեր փրկելու պատրվակով, կարող է լուրջ գործիք դառնալ քաղաքացիների նկատմամբ վերահսկողություն իրականացնելու համար»,- ընդգծեց Գորգիսյանը:
Նշեք, որ օրենսդրական փոփոխությունները նախատեսում են, որ արտակարգ դրության ռեժիմի պայմաններում համապատասխան մարմինները մուտք կունենան հանրային էլեկտրոնային ցանցի տվյալների հավաքագրմանը: ՀՀ կառավարությունը հնարավորություն կստանա հետեւել քաղաքացիների գտնվելու վայրին, նրանց տեղաշարժերին, ինտերնետային կապերին, շփումներին, դրանց հետ կապված հեռախոսահամարներին, զանգերի վերահասցեավորմանը, ինչպես նաեւ հեռախոսազանգերին, դրանց տեւողությանը, սակայն, ըստ Արդարադատության նախարարության, ոչ` խոսակցությունների բովանդակությունը:
