Սակուրայի ծաղկման ընթացքում զբոսայգիներ այցելելու արգելքից մի քանի շաբաթ անց Տոկիոյի նահանգապետ Յուրիկո Կոյկեն բնակիչներին հորդորել է հրաժարվել երկրում մեկ այլ հանրաճանաչ ժամանցի ձեւից` կարաոկե բարեր այցելելուց, գրում է The Guardian-ը: Նահանգապետը հայտնել է, որ Տոկիոյում 14 միլիոն մարդ մինչեւ ապրիլի 12-ը պետք է հրաժարվի բարեր, ռեստորաններ եւ կարաոկե բարեր այցելելուց:
Մինչ այժմ Ճապոնիային հաջողվում էր խուսափել կորոնավիրուսի այնպիսի ուժեղ տարածումից, ինչպիսին գրանցվել է ԱՄՆ-ում, Իտալիայում, Իսպանիայում եւ Իրանում, բայց վերջերս Տոկիոյում վարակակիրների թվի աճ է նկատվում, եւ վարակի աղբյուրները հաճախ գաղտնի են մնում: Իսկ ճապոնացի հայտնի կատակերգու Քեն Շիմուրայի` կորոնավիրուսի հետեւանքով մահից հետո հանրության շրջանում ավելի հաճախ են կառավարությանն ուղղված կոչեր հնչում` պանդեմիայի զսպմանն ուղղված ավելի խիստ միջոցների ձեռնարկման մասին: