Ուզում եմ հասկանալ՝ ի՞նչ է պատահել, սիրելի քաղաքացիներ, ընտրություններում 70 տոկոս քվեն ստանալուց հետո, որ մեր և ձեր մեջ այդ աստիճան պատնեշ է ստեղծվել։ Այս մասին այսօր ԱԺ արտահերթ նիստի ժամանակ իր ելույթում ասաց «Իմ քայլը» խմբակցության պատգամավոր Հայկ Կոնջորյանը՝ խոսելով ԱԺ-ում քննարկվող անձնական տվյալների ազատության և գաղտնիության իրավունքներին միջամտելու նախագծի շուրջ քննադատություններին։
Դիմելով ՀՀ քաղաքացիներին՝ պատգամավորը նշեց, որ խելամիտ չէ մտածել, որ կառավարությունն արտակարգ դրության ժամանակ պետք է գաղտնալսումներ անի: «Ինչի՞ համար գաղտնալսենք, եթե գաղտնալսումը ոչ միայն հանցագործություն է, այլ նաև այս պայմաններում՝ անբարոյականություն: Այն մարդիկ, որոնք այս օրերին սիստեմատիկ կերպով փորձում են այդ կասկածի որդը մտցնել մեր հանրության գիտակցության մեջ, սեփական իշխանության նկատմամբ։ Ուզում եմ հասկանալ՝ ի՞նչ է պատահել սիրելի քաղաքացիներ, ընտրություններում 70 տոկոս քվեն ստանալուց հետո, որ մեր և ձեր մեջ այդ աստիճան պատնեշ է ստեղծվել, եթե ստեղծվել է»,- ասաց նա:
Կոնջորյանը նշեց, որ «Իմ քայլը» այնքան ժողովրդավար խմբակցություն է, որ Կառավարության և սեփական խմբակցության ավելի շատ նախագիծ է տապալել, քան ընդդիմությունը: «Ասում եք՝ այս մարդիկ ուզում են ձեզ գաղտնալսել, գաղտնալսեն, որ ի՞նչ անեն: Ասում են՝ ծածուկ նիստ եք անում, ծածուկ նիստը ուղիղ եթերո՞վ են անում: Ուղեղի ցնցում է մարդ ստանում, այ ձեր ցավը տանեմ: Դուք մտածում եք, որ մենք տխմար ենք, հա՞»,-ասաց նա:
