ԱՄՆ նախագահ Դոնալդ Թրամփը ամերիկացիներին նախազգուշացրել է կորոնավիրուսի դեմ պայքարում ապագա «ցավագին» երկու շաբաթվա մասին, եւ որ երկրում մահացությունը կարող է հասնել հարյուր հազարավորի, չնայած սոցիալական հեռավորության պահպանման կանոններին անգամ խստորեն հետեւելուն, փոխանցում է Reuters-ը:
Թրամփը բնակչությանը կոչ է արել հետեւել իշխանությունների հանձնարարականներին եւ հավաքվել սահմանափակ թվով խմբերով՝ 10 մարդուց ոչ ավելի, աշխատել տանից եւ չընթրել ռեստորաններում ու բարերում:
«Ամերիկացի ժողովրդի համար միանգամայն կարեւոր է հաջորդ 30 օրվա ընթացքում հետեւել ցուցումներին: Սա կյանքի եւ մահվան հարց է»,- հայտարարել է նա:
Սպիտակ տան կորոնավիրուսի հարցերով համակարգող Դեբորա Բիրքսն իր հերթին ներկայացրել է դիագրամներ, որոնք ցուցադրում են կորոնավիրուսի տարածման դինամիկան:
Այդ տվյալների համաձայն՝ կորոնավիրուսի հետ կապված բարդությունների հետեւանքով առաջիկա ամիսներին երկրում հնարավոր է մահանա 100 հազարից մինչեւ 240 հազար մարդ:
Ըստ նախնական տեղեկությունների՝ առանց իշխանությունների ձեռնարկած միջոցառումների երկրում կարող է մահանալ մինչեւ 2,2 մլն մարդ:
Հենց այս վիճակագրությունն է Թրամփին ստիպել հրաժարվել Զատկի տոներից հետո տնտեսության տեմպերի վերականգնման նախնական ծրագրից: