Գյուղատնտեսության համար գործում են անտոկոս վարկի եւ փոխհատուցման ծրագրեր: Կառավարությունն առաջարկում է երկուս տեսակի գյուղատնտեսական ծրագիր՝ վարկավորում 0 տոկոս տոկոսադրույքով 3-12 ամսով, իսկ ինտենսիվ այգիների դեպքում՝ մինչեւ 5 տարի: Այս մասին այսօր՝ ապրիլի 1-ին, լրագրողների հետ հանդիպման ժամանակ հայտարարեց ՀՀ էկոնոմիկայի նախարարի տեղակալ Արման Խոջոյանը՝ հավելելով, որ գործում է նաեւ փոխհատուցման ծրագիր:

Նա պարզաբանեց, որ եթե քաղաքացին ցանկանում է օգտվել վարկից, ապա դիմում է ֆինանսական հաստատություն, որը հայտերի հավաքագրումից հետո կառավարությանն է ներկայացնում հնարավոր վարկառուների ցուցակը, որից հետո նախարարությունը թեկնածուների համար հեռահար կուրսեր է անցկացնում, որի ավարտից հետո սերտիֆիկատ է տրվում:

 «Իսկ փոխհատուցման տարբերակները ենթադրում են ջերմոցների, «խելացի ֆերմաների», ինտենսիվ այգերի կառուցում եւ արդիականացում: Շահառուները պետք է 5-օրյա կուրս անցնեն: Եթե, օրինակ, հայտը վերաբերի «խելացի ֆերմա» նախագծին, որը գնահատվում է 11 մլն դրամ, ապա մենք կփոխհատուցենք 5,5 մլն դրամ»,- նշեց փոխնախարարը:

Խոջոյանը հավելեց, որ կոոպերատիվների դեպքում, երբ նրանք դիմում են բանկին վարկ ստանալու համար, կազմակերպվում է 3-օրյա կուրս: «Ինչ վերաբերում է բանկերի աշխատանքին, ապա այս պահին տեղաշարժի սահմանափակման պատճառով դրանք աշխատում են սահմանափակ ձեւաչափով՝ հիմնականում հայտեր ընդունելով: Այն բանից հետո, երբ սահմանափակումները կհանվեն, բանկերը կսկսեն աշխատել լիարժեք ռեժիմով: Ընդհանուր առմամբ պետության հետ համագործակցում են 11 բանկեր եւ 7 վարկային կազմակերպություններ: Յուրաքանչյուր ֆինանսական հաստատություն ինքն է որոշում՝ որ ծրագրին միանա»,- եզրափակեց պաշտոնյան: