Ինձ թվում է պաշտոնաթող նախագահից բարձր էլ ստատուս չկա, ավելին է քան գործող նախագահը։ Այս մասին այսօր՝ ապրիլի 1–ին, լրագրողների հետ հանդիպման ժամանակ ասաց Արցախի նախագահի թեկնածու Արայիկ Հարությունյանը՝ պատասխանելով լրագրողի հարցին, որ երեկ Բակո Սահակյանն ասել է, որ շարունակելու է Արցախում ապրել, եթե հաղթեք Բակո Սահակյանը, որեւէ պաշտոն կզբաղեցնի, թե՞ ոչ։
«Բակո Սահակյանը հայտարարել է, որ մնալու է Ղարաբաղում եւ օգնելու է Ղարաբաղի իշխանություններին, բայց ի՞նչ է նշանակում, օգնելը պարտադիր պաշտոն պետք է լինի՞։ Պաշտոնաթող նախագահը դա արդեն ամենաբարձր պաշտոնն է»,– ասաց Հարությունյանը։
Հարցին, թե իմանալով, որ արդե 2–րդ փուլ է լինելու ՀՀ իշխանությունների ներկայացուցիչներից՝ մինչեւ ամենաբարձր մակարդակով, ո՞ւմ հետ է հեռախոսազրույց ունեցել, Հարությունյանը պատասխանեց. «Ոչ մեկի հետ ես չեմ քննարկել 2–րդ փուլ եւ այլն, այսինքն ի՞նչ է նշանակում հեռախոսազրույց ունեցե՞լ եք։ Ես ԱԺ նախագահի հետ խոսել եմ ընտրություններից առաջ, ընդամենը բարեմաղթանքներ, որ մաքուր ընտրություններ լինեն, արդյունքների մասին չենք էլ քննարկել, մնացած ոչ մեկի հետ։ Ես 2–րդ փուլին սպասում էի դեռ շատ վաղուց, այդքան միամիտ չեմ, որ 14 թեկնածուի պարագայում, այն էլ տեսեք ինչպիսի թեկնածուներ՝ բոլորը վաստակ ունեցող, ծանրակշիռ քաղաքական ուժեր, այսինքն ես քաղաքականության մեջ այդքան պրիմիտիվ չեմ էլի, որ չհասկանամ։ Բավականին ուսումնասիրությունների արդյուքնում ես միշտ տեսնում էի, որ 2–րդ փուլ լինելու է։ Վերջին հանդիպմանն էլ՝ շտաբի պետերի, ակտիվիստների հետ , ասացի վերջում 1–1.5 տոկոսի համար ենք պայքարելու եւ այդպես էլ եղավ։ Միայն Ստեփանակերտում մեր հաշվարկները 1500–2000 ձայնի տարբերություն տվեց՝ ի վնաս»։
Արայիկ Հարությունյանի խոսքով՝ ընտրությունների նախօրեին էլ հյուրանոցում պատահմամբ հանդիպել է «Իմ քայլի» պատգամավորներին. «Նրանցից ճանաչում էի միայն Ալեն Սիմոնյանին։ Ի դեպ նկարել են եւ ինձ հարց են տալիս ի՞նչ եք քննարկել, ասացի ոչ մի բան , չեմ էլ իմացել ովքեր են, միայ Ալենին էի ճանաչում Սիմոնյան, որպես ԱԺ փոխնախագահ, բարեւել ենք, չգիտեմ հասցրել եմ սուրճ խմել, թե ոչ, հարցնում են ինչ եք արել, ասացի ոչ մի բան, զրուցել ենք, հետո վեր կացել գնացել»։