Մահճակալներ նախատեսվում են ոչ միայն Կարեն Դեմիրճյանի անվան մարզահամերգային համալիրում, այլեւ ՀՀ բոլոր մարզերում առանձնացվել են մարզադահլիճներ, դահլիճներ, որոնք անհրաժեշտության դեպքում վերածվելու են հոսպիտալների՝ միջին ծանրության պացիենտների համար, գուցե նաեւ ծանր։ Այս մասին այսօր՝ ապրիլի 2–ին լրագրողների հետ հանդիպման ժամանակ ասաց առողջապահության նախարար Արսեն Թորոսյանը՝ պատասխանելով լրագրողի հարցին, որ Մարզայամերգահյինում ստեղծված վիճակը իրարանցում է ստեղծել հանրության շրջանում,ինչո՞ւ են այդ քանակի մահճակալներ տեղադրվել, արդյո՞ք վարակի բռնկման նոր շրջան է սպասվում։
«Մենք պետք է պատրաստ լինենք ցանկացած սցենարի եւ դրա մեջ, որեւէ տարօրինակ բան չկա, ավելին տարօրինակ կլիներ, եթե նման սցենարներ չքննարկվեին։ Քննարկվում են շատ ավելի վատ սցենարներ նաեւ, ինչպես շատ երկնրներում, երբ հիվանդանոցներում եւ մարզադահլիճներում տեղ չլինի պացիենտներին բուժելու համար եւ հենց դրանով է կարեւոր մեր բոլորի բարձր պատասխանատվության զգացումը դա թույլ չտալու համար։ Եթե նման իրավիճակ զարգանա, մենք պետք է պատրաստ լինենք դրան, ինչպես ցանկացած այլ արհավիրքի դեպքում՝ երկրաշարժ, ջրհեղեղ, պատերազմ։ Համաճարակը ոչնչով չի տարբերում իմ նշած մյուս արհավիրքներից»,–ավելացրեց նախարարը։
