1990 թվականի սերիական Dodge Dakota LS Sport Convertible կաբրիոլետ փիքափը ընթացիկ տարվա հունիսին վաճառվելու է Ինդիանապոլիսի աճուրդում, հայտնում է «Մոտորը»:
Համաշխարհային ավտոարդյունաբերության պատմության մեջ առավել եզակի եւ ոչ շարքային սերիական փիքափներից մեկը նոր տեր կունենա 2020 թվականի հունիսի 23-ին. Dodge Dakota կաբրիոլետ փիքափը կվաճառվի ԱՄՆ Ինդիանա նահանգի Ինդիանապոլիս քաղաքում անցկացվող Mecum տեղական աճուրդում: Bright White գույնի, 95 728 կմ վազքով ավտոմեքենան հոյակապ վիճակում է, պնդում է վաճառողը: Dodge Dakota LS Sport Convertible մոդելը թողարկվել է 1989-1991 թվականներին, այն Chrysler կորպորացիայի եւ American Sunroof Corporation ընկերության համատեղ նախագիծն էր:
Ամբողջությամբ մետաղական խցիկով ստանդատ փիքափները հավաքվում էին Ուորեն քաղաքում, Միչիգան նահանգ եւ ուղարկվում Սաութգեյթ, որտեղ տանիքը կտրում էին եւ տեղադրում ծալովի մեխանիզմ՝ վինիլային վերնամասով: Բացի դրանից, փիքափներն ունեին անվտանգության աղեղ եւ անշրջանակ դռներ: Մնացյալում ավտոմեքենան անփոփոխ էր. ծածկի տակ նույն Magnum ընտանիքի 3,9-լտրանոց բենզինային V6-ն էր, որը զարգացնում էր ընդամենը 125 ձիաուժ:
Այն աշխատում էր 4-աստիճանի ավտոմատ փոխանցման տուփի եւ հետին հաղորդակի տրանսմիասիայի զույգով: Նստատեղերը երեսապատված էին գորշ գործվածքով, ուներ օդորակիչ եւ ապակիների էլեկտրական ամբարձիչներ: Dodge Dakota LS Sport Convertible կաբրիոլետ փիքափը թողարկվել է ընդամենը 2 842 օրինակով, որից 909-ը հավաքվել է 1990 թվականին: Աճուրդի կազմակերպիչները սպիտակ փիքափի մեկնարկային գինը գաղտնի են պահում: