Ավստրիայի դաշնային կանցլեր Սեբաստիան Կուրցը հայտարարել է, որ կաթոլիկ Զատկից անմիջապես հետո, այսինքն՝ սկսած ապրիլի 14-ից, իշխանությունները կմեղմեն երկրում խիստ սահմանափակումները, որոնք գործում էին SARS-CoV-2 պանդեմիայի կապակցությամբ, հաղորդում է DW-ը։
Նրա խոսքով՝ զգուշության անհրաժեշտ միջոցառումները պահպանելու դեպքում կարող են վերսկսել աշխատանքը մինչեւ 400 ք/մ մակերեսով փոքր խանութները, ինչպես նաեւ մասնագիտացված առեւտրային ձեռնարկությունները, որտեղ վաճառվում են շինարարական եւ այգեգործական պարագաներ։
Ըստ պլանի՝ մայիսի 1-ին կբացվեն մյուս բոլոր խանութները, առեւտրի կենտրոնները ու գեղեցկության սրահները։ Այդ մասին վերջնական որոշումը կկայացվի ապրիլի վերջում։
Դպրոցները, սակայն, փակ կլինեն մինչեւ առնվազն մայիս, բոլոր զանգվածային միջոցառումները չեղարկվել են մինչեւ հունիսի վերջ։
Միեւնույն ժամանակ Կուրցը երկարաձգել է բնակչության տեղաշարժին վերաբերող սահմանափակումները մինչեւ մայիսի 1-ը։ Ներկայումս բնակիչներն իրավունք ունեն հեռանալ տնից չորս նպատակով՝ աշխատանքի գնալու, մթերքներ գնելու, ուրիշ մարդկանց օգնելու եւ բաց երկնքի տակ անհատական մարզումներ կատարելու համար։
Ապրիլի 6-ին Ավստրիայի առողջապահության նախարարությունը հայտնել էր, որ COVID-19-ի հետեւանքով մահացածների թիվը հասել է 220-ի, վարակված է առնվազն 12 հազար, իսկ ապաքինվել է 3463 մարդ։