Վրաստանի Հանրային առողջության եւ հիվանդությունների վերահսկման ազգային կենտրոնի ղեկավարի տեղակալ Պաատա Իմնաձեն կոչ է արել հավատացյալներին կորոնավիրուսի համաճարակի ժամանակ աղոթել տան պայմաններում եւ չայցելել եկեղեցի չվարակվելու եւ շրջապատողների, այդ թվում՝ հոգեւորականների համար վարակի աղբյուր չդառնալու համար, հաղորդում է Նովոստի-Գրուզիա-ն։
«Ես ցանկանում եմ դիմել հավատացյալ քրիստոնյաներին․ մենք կարող ենք պաշտպանել հոգեւորականներին եկեղեցի չգնալով եւ կաղոթենք տանը։ Այդպես մենք կպաշտպանենք նրանց բոլոր վիրուսներից։ Եկեղեցու դռները չեն կարող փակ լինել․ այնտեղ կլինեն հոգեւոր ծառայողները, որոնք կաղոթեն մեզ համար։ Եկեք մենք տանն աղոթենք միմյանց եւ մեր երկրի համար»,-հայտարարել է Իմնաձեն։
Ավելի վաղ Վրաստանի վարչապետ Գեորգի Գախարիան եւ կառավարության երեք նախարարներ հայտարարել էին, որ այս տարի կորոնավիրուսի տարածման վտանգի պատճառով խախտելու են Զատկի ծիսակարգին մասնակցելու ավանդույթն ու դիտելու են արարողությունը հեռուստացույցով։
Պատրիարքարանում նույնպես հայտարարել են, որ մտադիր են հետեւել համաճարակաբանների խորհուրդներին, եւ հաշվի առնելով պարետային ժամը՝ եկեղեցիները կփակեն 20:00-ին։