YouTube տեսահոսթինգի ներկայացուցիչները հայտարարել են, որ պատրաստվում են սահմանափակել կոնտենտի տարածումը, որը տեղեկություններ է պարունակում կորոնավիրուսային համավարակի վրա 5G կապի հիպոթետիկ ազդեցության մասին: Այս որոշումը պայմանավորված է Մեծ Բրիտանիայում Vodafone եւ O2 բջջային օպերատորմերի աշտարակների վրա մի շարք հարձակումներով, փոխանցում է Naked-Science-ը:
Անգլիայում անցյալ շաբաթ գրանցվել էր բջջային կապի աշտարակների հրկիզման 4 դեպք: Ընդ որում՝ ոչնչացվել էին 5G-ի հետ ոչ մի կապ չունեցող սարքավորումներ: Վանդալիզմի պատճառը համացանցում տարածվող դավադրության տեսությունն է: Դրա համաձայն՝ չինական Ուհանում բռնկումը սկսվել է հենց այն ժամանակ, երբ այնտեղ սկսել են տեղակայել 5-րդ սերնդի կապի ցանցը: Ապակողմնորոշող տեղեկությունների հեղինակները սրանից եզրակացության են հանգել, որ 5G կապն ինչ-որ ձեւով նպաստում է Covid-19-ի տարածմանը:
Այս դավադրության տեսության մասին պատմող տեսանյութերը YouTube-ում մտնում են «սահմանային կոնտենտ» կարգի մեջ: Ֆորմալ առումով դրանք ծառայության կանոնները չեն խախտում, սակայն սահմանափակվել է օգտատերերի համար հանձնարարելիների ցուցակում դրանց հայտնվելը: Տեսահոսթինգի ներկայացուցիչների խոսքով՝ նման հոլովակները հեռացվելու են նաեւ որոնումների արդյունքներից, իսկ հեղինակները զրկվելու են գովազդային եկամուտներից:
Չնայած ախտածինի տարածման վրա բջջային կապի ազդեցության վերաբերյալ որեւէ գիտական ապացույց չլինելուն, այդ թեմայով տեսանյութերը գրավում են մեծ թվով մարդկանց մտքերը: Տեսությունը արժանացել է նույնիսկ մի քանի հայտնիների աջակցությանը. օրինակ՝ Հոլիվուդի դերասան Վուդի Հարելսոնի եւ բրիտանացի բռնցքամարտիկ Ամիր Հանի: Նրանց կարծիքով՝ էլեկտրամագնիսական ճառագայթումը ճնշում է մարդու իմունիտետը՝ մեզ անզեն դարձնելով բակտերիաների եւ վիրուսների դեմ: Որոշ տեսանյութեր ընդհանրապես առաջ են քաշում տեսություն այն մասին, որ 5G-ցանցը մարդկանց մահն առաջացնում է ինքնաբերաբար, իսկ «իրականում գոյություն չունեցող համավարակը» միայն դա թաքցնելու միջոց է:
Փետրվարի սկզբից YouTube-ի մոդերատորներն արդեն դիտել եւ հեռացրել են մի քանի հազար տեսանյութեր, որոնք տարածում են կորոնավիրուսի մասին վտանգավոր եւ մոլորության մեջ գցող տեղեկություններ: Հարկ է նշել, որ տեսանյութերը, որոնք 5G-ի վերաբերյալ ոչ հավաստի տեղեկություններ են տարածում, բայց չեն հիշատակում կորոնավիրուսի հետ կապի մասին, նույնպես մտնում են «սահմանային կոնտենտ» որակման մեջ եւ կարող են հեռացվել:
GSM ասոցիացիայի գլխավոր տնօրեն Մաթս Գրանրիդը, որը բջջային կապի օպերատորների շահերը ներկայացնում է ամբողջ աշխարհում, դատապարտել է աշտարակների հրկիզումը. «Հեռահաղորդակցային ինդուստրիան աշխատում է շուրջօրյա, որ ապահովի կենսական կարեւորություն ունեցող առողջապահության, կրթության եւ շտապ օգնության առցանց ծառայություններին աջակցությունը, ինչպես նաեւ ապահովի ընկերների եւ ազգականների միջեւ կապը: Այն փաստը, որ չափազանց կարեւոր կապի ենթակառուցվածքը ենթարկվում է բացահայտ հարձակումների ակնհայտ ստի հիմքով, ափսոսանք է հարուցում: Մենք բոլորին կոչ ենք անում վստահել առողջապահության մարմիններին, վստահ եղեք, որ հաղորդակցային տեխնոլոգիաներն անվտանգ են: Ոչ մի կապ չկա 5G-ի եւ Covid-19-ի միջեւ»:
