Կորոնավիրուսի տարածումը կանխելու նպատակով Վրաստանի մի շարք շրջաններ փակ են այցելությունների համար, ինչը լուրջ հարված է հասցրել հանրապետությունում ներքին զբոսաշրջությանը: Այս մասին ապրիլի 8-ին Մինսկ-Երեւան- Քիշնեւ-Մոսկվա-Թբիլիսի համատեղ վիդեոկոնֆերանսի ժամանակ ասաց Վրաստանի գիդերի ասոցիացիայի անդամ Եկատերինա Լոմաձեն:
Փորձագետի խոսքով` հենց որ երկիրը բացվի «ինքն իր համար», այսինքն` իր քաղաքացիների եւ ներքին զբոսաշրջիկների համար, հնարավոր կլինի խոսել այլ երկրների քաղաքացիների այցերի մասին: «Զբոսաշրջային գոտիներն ու ծառայությունները, առաջին հերթին, պետք է մատչելի լինեն հենց վրացիների համար, ինչը թույլ կտա սկզբնական շրջանում ոլորտը դուրս հանել ճգնաժամից»,- պարզաբանեց Լոմաձեն:
Ըստ նրա, որ հենց որ Եվրոպայում եւ ԱՄՆ-ում իրավիճակը կայունանա, դրանից հետո զբոսաշրջային հոսքերի հետ կապված իրավիճակը կկայունանա նաեւ ամբողջ աշխարհում` հավելելով, որ մինչեւ սեպտեմբեր իրավիճակը կկայունանա: Իսկ զբոսաշրջության շուկայում իրավիճակի հնարավորինս արագ կայունացման համար, վրացի փորձագետի կարծիքով, անհրաժեշտ է ազատականացնել ԱՊՀ երկրներից այցերի հնարավորությունները: Միեւնույն ժամանակ, Լոմաձեն կարծում է, որ Վրաստանի ղեկավարությունը չափազանց մեծ ուշադրություն է հատկացրել զբոսաշրջության ոլորտին` դրա հետ մեծ հույսեր կապելով: Արդյունքում, կորոնավիրուսի բռնկումից հետո երկրի տնտեսությունը, ինչպես եւ ամբողջ հանրապետությունը, հայտնվեց բավականին բարդ իրավիճակում: «Վրաստանի բոլոր հյուրանոցները վերավորակավորվել են կարանտինի համար»,- նշեց Վրաստանի գիդերի ասոցիացիայի անդամը` հավելելով, որ իշխանությունները նոր են միասյն սկսել հաշվարկել կորուստները զբոսաշրջության ոլորտում, եւ, հետեւաբար, դեռ կոնկրետ թվեր չկան: