Առցանց գնումների շրջանառությունը Հայաստանում եռապատկվել է: Այս մասին այսօր կառավարության մամուլի կենտրոնում հրավիրված ասուլիսին հայտարարեց բարձր տեխնոլոգիաների արդյունաբերության նախարար Հակոբ Արշակյանը:
«Մենք տվյալներ ենք ստանում էլեկտրոնային առեւտրի տարբեր կայքերից. շրջանառությունը գրեթե եռապատկվել է: Սա նշանակում է, որ մեկուսացման պայմաններում առցանց առեւտրով զբաղվող ընկերություններին հաջողվել է արդյունավետորեն կազմակերպել իրենց գործունեությունը»,- ասաց նախարարը:
Ավելացել է նաեւ ֆինանսական միջոցների առցանց շրջանառությունը: «Ես սա դրական գործընթաց եմ համարում: Կարծում եմ, որ անկանխիկ առցանց առեւտրի հետ կապված հնարավորությունները դրականորեն կանդրադառնան երկրի զարգացման վրա` ինչպես թափանցիկության ապահովման, այնպես էլ երկրի հարմարության եւ համաչափ զարգացման առումով: Ուստի ես հույս ունեմ, որ այս միտումները կշարունակվեն»,- հայտարարեց Արշակյանը: