ՀՀ բարձր տեխնոլոգիաների արդյունաբերության նախարարության մի շարք ծրագրեր կվերափոխվեն: Այս մասին այսօր կառավարության մամուլի կենտրոնում հրավիրված ասուլիսին հայտարարեց բարձր տեխնոլոգիաների արդյունաբերության նախարար Հակոբ Արշակյանը:
Ըստ նրա` անցյալ տարի հայտարարվել էր պետության աջակցությամբ Երեւանում եւ մարզերում ծրագրավորման հիմունքների եւ պրոֆեսիոնալ ծրագրավորման դասընթացների կազմակերպման մասին: Ներկայումս, հայտնի պատճառներով, այդ հնարավորությունը չկա, ուստի որոշվել է վերաձեւակերպել ծրագրերը` դասընթացներն առցանց ռեժիմով ապահովելու համար: Այսօր նախարարությունը նախատեսում է մրցույթ հայտարարել ծրագրավորման հիմունքների վերաբերյալ առցանց դասընթացների կազմակերպման համար:
Նախարարը կոչ արեց այն ընկերություններին, ովքեր նման առցանց դասընթացներ են անցկացնում պրոֆեսիոնալ մակարդակի վրա, մասնակցել մրցույթին: «Ես կցանկանայի նաեւ կոչ անել մեր հայրենակիցներին օգտվել ազատ ժամանակի առկայությունից եւ նոր գիտելիքներ ձեռք բերել ծրագրավորման լեզուների մասին»,- հայտարարեց նախարարը: Նա նշեց, որ ՏՏ ոլորտը զգալի աճ է արձանագրել, եւ երկրին անհրաժեշտ է եւ անհրաժեշտ կլինեն այդպիսի մասնագետներ: