Դեղամիջոցների արտադրողներին ուղղված նամակում Եվրահանձնաժողովը տագնապ է հնչեցրել. առաջիկա օրերին հիվանդանոցներում COVID-19-ով վարակված ծանր հիվանդների բուժման համար դեղամիջոցները կարող են սպառվել, հայտնում է գերմանական Die Welt պարբերականը: Խոսքը սեդատիվ դեղերի, ցավազրկողների, վերակենդանացման համար նախատեսված դեղամիջոցների, միոռելաքսանտների եւ հակաբիոտիկների մասին է:
Die Welt- ի եւ Լոնդոնի Հետաքննական լրագրության բյուրոյի տրամադրության տակ գտնվող նամակում «Առողջապահության եվրոպական հանձնակատար Ստելլա Կիրիակիդեսը կոչ է անում եվրոպական դեղագործական արդյունաբերության մի շարք ասոցիացիաների կոչ էր արել խրախուսել ընկերություններին ավելացնել նշված դեղերի արտադրությունը` ընդգծելով խնդրի «ծայրահեղ հրատապությունը», փոխանցում է պարբերականը:
Ինչպես նշվում է նամակում, ավելի վաղ ԵՄ մի շարք երկրներ տեղեկացրել էին Եվրոպական դեղամիջոցների գործակալությանը (EMA), որ կենսական կարեւորության դեղամիջոցների պաշարը կբավականեցնի ընդամենը եւս մեկ շաբաթ:
Կլինիկաները EMA-ին տեղեկացրել են, որ, ընդհանուր առմամբ, վերջանում է վերակենդանացման համար անհրաժեշտ 47 ակտիվ դեղամիջոց: «COVID-19 վիրուսով ծանր հիվանդները, որոնք գտնվում են ինտենսիվ թերապիայի բաժանմունքում եւ միացված են ԹԱՇ ապարատներին, մինչեւ 50 տարբեր դեղամիջոց է անհրաժեշտ, այդ թվում նաեւ` ինտուբացիայի համար օգտագործվող սեդատիվ միջոցներ եւ դեղեր»,- պարզաբանում է պարբերականը:
«Եվրահանձնաժողովին ուղղված նամակից հետեւում է նաեւ, որ եվրոպական որոշ երկրներում արդեն հիմա վերջացել են ծանր հիվանդների բուժման համար անհրաժեշտ դեղամիջոցները: Մասնավորապես, դա վերաբերում է Իսպանիային, Ֆրանսիային, Շվեդային, Ֆինլանդիային եւ Ավստրիային»,- նշվում է հրապարակված հոդվածում: Ըստ Հետաքննական լրագրության բյուրոյի` դեղորայքի պակասը հանգեցնում է նրան, որ COVID-19-ով հիվանդներին բուժելիս կլինիկաները ստիպված են լինում դիմել այլ, դեռեւս առկա այլընտրանքային դեղամիջոցների, որոնց մի մասն ավելի ուժեղ ազդեցություն ունի: Նշվում է, որ սա, իր հերթին, կարող է էապես վատացնել բուժման որակը: Մասնավորապես, պետք է զգուշանալ տարեց հիվանդների թվի աճից, որոնց մոտ անզգայացման համար օգտագործվող դեղամիջոցներն այսպես կոչված դելիրիում են առաջացնում`ուղեղի գործառույթի լուրջ խախտում, որը, ի թիվս այլ բաների, կարող է ազդել գիտակցության, հիշողության եւ հոգեշարժման վրա:
«Բրիտանական դեղագործական միության նախագահ Գրեգ Բարտոնը լրագրողներին ասել է, որ կորոնավիրուսի համաճարակի հետեւանքով առաջացած դեֆիցիտը սպառնում է «20 տարով հետ գցել» հիվանդներին անզգայացնող միջոցներով ապահովումը»,- փոխանցում է Die Welt- ը:
