Այս շաբաթվա ընթացքում ԱՄՆ-ում կորոնավիրուսից մահացությունների թիվը կշարունակի աճել, նույնիսկ չնայած նրան, որ վարակման նոր դեպքերը մոտենում են իրենց գագաթնակետին եւ հոսպիտալացման տեմպերը դանդաղում են, հայտարարել է Սպիտակ տան` առողջապահության հարցերով խորհրդական, Ալերգիայի եւ վարակիչ հիվանդությունների ազգային ինստիտուտի տնօրեն, դոկտոր Էնտոնի Ֆաուչին, փոխանցում է CNBC-ն:
«Սա շատ վատ շաբաթ է լինելու»,- ասել է նա Fox News-ին տված հարցազրույցում: Ըստ Ֆաուչիի ՝ մահացությունը, որպես կանոն, հետ է մնում բռնկման այլ ասպեկտներից, ինչպիսիք են նոր դեպքերը եւ հոսպիտալացումը: Այս շաբաթից հետո ԱՄՆ-ն պետք է տեսնի «փոփոխությունների սկիզբը»:
Սպիտակ տունն ավելի վաղ կանխատեսել էր, որ ԱՄՆ-ում կորոնավիրուսից կարող է 10 000-ից մինչեւ 240 000 մարդ մահանալ: Սակայն քանի որ մարդիկ շարունակում են հետեւել սոցիալական հեռավորության պահպանման կանոններին, այդ թվերը կարող են նվազել, ասել է Ֆաուչին:
Ըստ նրա` ԱՄՆ առողջապահության ոլորտի պաշտոնյաները պլանավորում են երկիրը նորմալ հունի վերադարձնելու ուղիները, եթե այս ամսվա ընթացքում սոցիալական հեռավորության պահպանումը եւ COVID-19-ի դեմ պայքարի այլ միջոցները դրական արդյունքներ տան:
Թրամփի վարչակազմը 30 օրով կարանտին է հայտարարել. դպրոցներն ու ընկերությունները փակ են, ամերիկացիների մեծ մասը մեկուսացման մեջ է:
Ֆաուչին ասել է, որ նման միջոցառումները պետք է շարունակվեն, բայց հուսադրող նշաններ կան, որ դրանք աշխատում են: «Եթե մեզ իրականում հաջողվի հաջողության հասնել, իմաստ ունի առնվազն պլանավորել, թե ինչպիսի տեսք կունենա վերադարձը բնականոն կյանքին: Սա չի նշանակում, որ մենք պատրաստվում ենք դա հենց հիմա անել, բայց նշանակում է, որ մենք պետք է պատրաստ լինենք դրան»,- ասել է Ֆաուչին:
Կորոնավիրուսի դեմ պայքարի աշխատանքային խմբի մեկ այլ անդամ դոկտոր Դեբորա Բիրքսն ասել է, որ մեկուսացման միջոցառումները պետք է շարունակվեն, հակառակ դեպքում երկիրը կարող է բախվել կրկնվող բռնկման վտանգին: «Եթե մարդիկ նորից սկսեն դուրս գալ տնից եւ շփվել միմյանց հետ, մենք երկրորդ սուր ալիք կտեսնենք»:
