Ընդհուպ մինչեւ երեկվա ցուցանիշներով՝ Կառավարության ընդունած հակաճգնաժամային միջոցառումների փաթեթների հասանելի միջոցների գումարը կազմում է 3 մլրդ 670 մլն դրամ: Այս մասին ապրիլի 9-ին լրագրողների հետ հանդիպման ժամանակ ասաց փոխվարչապետ Մհեր Գրիգորյանը:
Նրա պարզաբանմամբ՝ միջոցառումների 10 փաթեթից 6-ն արդեն գործում է, եւ սա վատ ցուցանիշ չէ: «Միջոցառումների 7-րդ փաթեթը հասանելի կլինի արդեն վաղը, իսկ 8-րդ, 9-րդ եւ 10-րդ փաթեթների իրականացումը կսկսվի երկուշաբթի: Այսօր ընդունվել է միկրոբիզնեսին առնչվող եւս մեկ միջոցառում, որի իրականացումը տեղի կունենա արագ, քանի որ թիրախային խումբը հայտնի է»,- նշեց Գրիգորյանը:
Նրա խոսքով՝ իշխանությունները վերլուծում են խթանները, որոնք ստանում է բիզնեսը: «Մենք ցանկանում ենք, որ դա լինի ոչ թե հակաճգնաժամային գործիքով, այլ այն մասնավոր հատվածի զարգացման գործիքով, որն ապագայի հեռանկար ունի: Սոցիալական աջակցության միջոցառումները թիրախային բնույթ ունեն, իսկ դրանց շահառուների հստակեցումն օգտակար կլինի ապագայում անհրաժեշտ ծրագրերի իրականացման համար»,- ամփոփեց փոխվարչապետը: