Մարտի 9-ին գիտության, կրթության, մշակույթի, սփյուռքի, երիտասարդության եւ սպորտի հարցերով մշտական խորհրդարանական հանձնաժողովը հեռավար բանավեճ էր կազմակերպել` «Արտակարգ իրավիճակում հեռավար ուսուցման մարտահրավերներն ու հնարավորությունները» թեմայով:
Պատգամավորների մեծ մասը բանավեճին մասնակցում էր տնից, իսկ ոմանք՝ խորհրդարանում իրենց աշխատասենյակներից: Բանավեճին մասնակցում էին նաեւ շահագրգիռ այլ անձինք: Նրանց թվում էր փոխնախարարը, ինչպես նաեւ` կրթական ոլորտի մասնագետներ եւ ՀԿ-ների ներկայացուցիչներ:
Հանձնաժողովի նախագահ, իշխող «Իմ քայլը» դաշինքից պատգամավոր Մխիթար Հայրապետյանն իր բացման խոսքում, մասնավորապես, շեշտել է, որ իրենց խնդիրը հանրապետությունում հեռավար կրթության ինստիտուցիոնալացումն է: Քննարկման ընթացքում նա նաեւ առաջարկել է ավելի մեծ ուշադրություն դարձնել միջնակարգ կրթության ոլորտում առկա խնդիրներին: Պատգամավորի խոսքով` քննարկման հիմնական խնդիրը պետք է դառնա երկու կարեւոր հարցերի պատասխաններ ստանալը. հեռավար կրթության կազմակերպման ինչ խնդիրներ եւ մարտահրավերներ կան եւ ինչ է անհրաժեշտ անել` դրանք կարճաժամկետ եւ երկարաժամկետ հեռանկարում լուծելու համար:
