Իրաքի նախագահ Բարհամ Սալեհը հետախուզության ղեկավար Մուստաֆա ալ-Կազիմիին հինգշաբթի հանձնարարել է նախարարների նոր կաբինետ ձեւավորել, հայտնում է ՏԱՍՍ-ը ՝ վկայակոչելով Al Sumaria-ն:
Պետության ղեկավարը կաբինետ ձեւավորելու իրավասություն է տվել Ալ-Կազիմիին այն բանից հետո, երբ հինգշաբթի օրը ներկայիս նշանակված վարչապետ Ադնան ալ-Զուրֆին հրաժարվեց Իրաքի կառավարության ձեւավորումից: 53-ամյա Ալ-Կազիմին, որն անկախ քաղաքական գործիչ է համարվում, Իրաքի հետախուզության պետ է նշանակվել 2016-ի հունիսին:
Ամիսներ տեւած հակակառավարական ցույցերից հետո, որոնք երկրում ճգնաժամի հանգեցրեցին, փետրվարի 1-ին Սալեհը հավանություն էր տվել շիաների խմբակցությունների խորհրդարանականների կողմից առաջարկված կապի նախկին նախարար Մոհամմադ Թաուֆիկ Ալաուիի թեկնածությանը եւ հանձնարարել էր նրան կառավարություն ձեւավորել: Մարտի 1-ին նախարարների կաբինետի նշանակված ղեկավարը հետ էր կանչել իր թեկնածությունն այն բանից հետո, երբ խորհրդարանականները երկու անգամ չկարողացան նիստ անցկացնել` վստահության քվեն փոխանցելու համար: Մարտի 17-ին Սալեհն ալ-Զուրֆիին էր կարգադրել նախարարների կաբինետ ձեւավորել, ինչի համար նրան 30 օր էր հատկացվել:
Քանի դեռ կառավարության ձեւավորման գործընթացը չի ավարտվել, կաբինետի ղեկավարի պարտականությունները շարունակում է կատարել Ադել Աբդել Մահդին, ով հրաժարական էր տվել 2019-ի նոյեմբերի վերջին: