Վրաստանի եւ Միացյալ Նահանգների կառավարությունները հատուկ թռիչք են կազմակերպում կրթական ծրագրերի շրջանակներում ԱՄՆ-ում գտնվող 79 վրացի ուսանողի` հայրենիք վերադառնալու համար:
Ինչպես լրագրողներին հայտնել է Վրաստանի վարչապետ Գեորգի Գախարիան, հատուկ թռիչքը տեղի կունենա ապրիլի 10-ին: Նախ Միացյալ Նահանգներից ինքնաթիռը դպրոցականներին կտեղափոխի Քաթարի մայրաքաղաք Դոհա, իսկ այնտեղից վրացական ավիաընկերությունը նրանց Թբիլիսի կբերի: Դպրոցականներին Վրաստան տեղափոխելու որոշումը համաձայնեցվել է նրանց ծնողների հետ, հայտնում է «Նովոստի-Գրուզիա»-ն:
«Վաղը` ապրիլի 10-ին, ԱՄՆ-ից դեպի Դոհա չվերթ կիրականացվի: Ամերիկյան կողմն իր վրա է վերցրել այս թռիչքի ապահովումը, իսկ Դոհայից Թբիլիսի 79 անչափահաս աշակերտի տեղափոխումը կապահովի վրացական կառավարությունը»,- հայտարարել է Գախարիան:
Վարչապետը նշել է, որ հայ գործընկերները խնդրել են նույն թռիչքով Ամերիկայից տեղափոխել նաեւ 35 հայ աշակերտի:
Ըստ Վրաստանի արտգործնախարարության` արտասահմանից (Չինաստանից, Իտալիայից, Իրանից, Լեհաստանից, Բուլղարիայից, Գերմանիայից, Հունաստանից, Բելառուսից, Նիդեռլանդներից, Եգիպտոսից, Ադրբեջանից եւ Հայաստանից) տուն է վերադարձել ավելի քան 5000 քաղաքացի:
Ապրիլի 16-ին նախատեսված է Փարիզ-Թբիլիսի չվերթը, ապրիլի 18-ին` Թել Ավիվ-Թբիլիսի, ապրիլի 21-ին` Հռոմ-Թբիլիսի: Թռիչքները կիրականացնի Georgian Airways վրացական ավիաընկերությունը: Ապրիլի 24-ին նախատեսված է Թբիլիսի-Բարսելոնա-Թբիլիսի չվերթը, իսկ ապրիլի 27-ին կիրականացվի Թբիլիսի-Վարշավա-Թբիլիսի չվերթը: Թռիչքները կիրականացվեն են Առողջապահության համաշխարհային կազմակերպության ցուցումների համաձայն: Տոմսերը վաճառքի կհանվեն թռիչքից երկու օր առաջ եւ կարժենան 199 եվրոյից ոչ ավել:
