Դեղագործական ընկերության նախկին գործադիր տնօրեն՝ խարդախության եւ այլ հանցագործությունների համար դատապարտված Մարթին Շքրելին, առավել հայտնի որպես «Pharma Bro», ցանկանում է դուրս գալ բանտից՝ փոխարենը խոստանալով հայտնաբերել կորոնավիրուսի դեմ դեղամիջոց, հաղորդում է Americaru-ն:
Փաստաբան Բեն Բրաֆմանն ասել է, որ փաստաթղթերը կներկայացնի դատարան՝ խնդրելով դաշնային իշխանություններին երեք ամսով ազատել Շքրելիին, որպեսզի նա կարողանա իրականացնել լաբորատոր աշխատանքներ դեղորայքը ստեղծելու շուրջ «խիստ վերահսկողության ներքո»: Այժմ Շքրելին գտնվում է Ալենվուդի խիստ հսկողության բանտում (Փենսիլվանիա):
«Ես միշտ ասել եմ, որ եթե Մարթինը կալանավորված մնա լաբորատորիայում, նա կկարողանա օգնել բուժել քաղցկեղը: Հնարավոր է՝ նա կկարողանա օգնել գիտական հանրությանը հասկանալ այդ սարսափելի վիրուսը, եթե նրան այդպիսի շանս տրվի»,-ասվում է Բրաֆմանի հայտարարության մեջ:
Ավելի վաղ Շքրելին փաստաբանների միջոցով անվանել էր դեղագործական արդյունաբերության արձագանքը պանդեմիայի նկատմամբ «ոչ ադեկվատ» եւ ասել էր, որ յուրաքանչյուր դեղագործական ընկերության հետազոտողները պետք է ներգրավվեն աշխատանքում, քանի դեռ չի վերացել COVID-19-ը:
2018 թվականին Շքրելին դատապարտվել էր 7 տարվա ազատազրկման հանցագործությունների համար, որոնք ներառում էին ներդրողներին կեղծ տեղեկատվության տրամադրում, ներդրված գումարների շուրջ խարդախություններ եւ խաբեությամբ դեղորայքի գների բարձրացում: