ԱԻ նախարար Ֆելիքս Ցոլակյանի հրամանով Փրկարար ծառայության ստորաբաժանումները իրականացրել են ամենօրյա վարակազերծման կանխարգելիչ միջոցառումներ ՀՀ ութ մարզում եւ Երեւանում: Այս մասին հայտնում են ԱԻՆ-ից։
Ապրիլի 9-ին փրկարարները վարակազերծել են 490 հանրային տարբեր նշանակության վայրեր, որոնցից 129-ը՝ առեւտրի կենտրոններ, սուպերմարկետներ եւ խանութներ:
Վարակազերծվել են Գեղարքունիքի մարզպետարանի, Արարատի, Բերդի, Մարտունու, Վեդու համայնքապետարանների, սոցիալական ապահովման Գավառի տարածքային բաժնի, Երեւանի Մարդու իրավունքների պաշտպանի գրասենյակի, Վաղարշապատի ծննդատան եւ պոլիկլինիկայի, 5 մարզային բժշկական կենտրոնների եւ 4 դեղատան, Մարտունու զինկոմիսարիատի, Գավառի եւ Նորատուս գյուղի 4 եկեղեցիների, Վեդու եւ Արտաշատի «Հայփոստ» ՓԲԸ-ի մասնաճյուղերի, Արարատի կապի սպասարկման 3 կետերի շենքերը:
Վարակազերծվել են Վանաձորի, Կապանի շուկաները, Գյումրու շուկայի «Լաչինի անցում» կոչվող տարածքը, Տաշիրի «Դուստր Մելանյա» ՍՊԸ պանրի գործարանի տարածքը, 1 բնակելի շենք, 44 բանկոմատներ, 27 բանկային եւ 6 վարկային կազմակերպություններ եւ 15 այլ հանրային նշանակության վայրեր:
Ամենօրյա վարակազերծման են ենթարկվում ԱԻՆ բոլոր կառուցվածքային եւ տարածքային ստորաբաժանումների շենքերն ու շինությունները, բակերն ու բոլոր տեսակի տրանսպորտային միջոցները, գույքը, տեխնիկան եւ փրկարար ծառայողների համազգեստը:
